Read nynorsk 1978 Kolossarane 3 Bible Online

Kolossarane 3 - nynorsk 1978 bible

Kolossarane 3

¹Er de då oppreiste med Kristus, så søk det som er der oppe, der Kristus sit ved Guds høgre hand.

²Lat hugen dykkar vera vend til det som er der oppe, ikkje til det som er på jorda.

³De er då døde, og livet dykkar er løynt med Kristus i Gud.

⁴Men når Kristus, vårt liv, openberrar seg, skal de òg openberrast i herlegdom saman med han.

⁵Så lat då det jordiske i dykk døy: hor, ureinskap, lidenskap, vond lyst og havesykje, som ikkje er anna enn avgudsdyrking.

⁶Det er slikt som gjer at Guds vreide kjem over dei ulydige.

⁷Til dei høyrde de òg den gongen de levde i desse syndene.

⁸Men no må de leggja av alt dette: sinne, ilske, vondskap, spott og rått snakk.

⁹Og lyg ikkje for kvarandre! For de har lagt av det gamle mennesket med dei gjerningar det gjer

¹⁰og ikledt dykk det nye mennesket, som vert fornya etter sin skapars bilete og lærer han å kjenna.

¹¹Her er ikkje grekar eller jøde, omskoren eller uomskoren, utlending, skytar, træl eller fri; men Kristus er alt og i alle. [2]

¹²De er Guds utvalde, helga og elska av han. Kled dykk difor i inderleg medkjensle og godleik! Ver audmjuke, ta dykk ikkje sjølve til rettes, men ver tolsame,

¹³så de ber over med kvarandre og tilgjev kvarandre, om den eine har noko å klaga den andre for. Som Herren har tilgjeve dykk, skal de tilgje kvarandre.

¹⁴Og framfor alt, kled dykk i kjærleik, det bandet som bind saman og fullendar.

¹⁵Lat Kristi fred rå i hjarto dykkar, for til det vart de kalla då de vart ein lekam. Og ver takksame!

¹⁶Lat Kristi ord få rikeleg rom hjå dykk, så de med visdom kan læra og rettleia kvarandre, med salmar, hymner og åndelege songar; syng for Gud med takk i hjarta!

¹⁷Og alt de gjer, i ord og gjerning, gjer det i Herren Jesu namn, med takk til Gud Fader ved han.

¹⁸De koner skal underordna dykk mennene dykkar, som det sømer seg for kristne.

¹⁹De menn skal elska konene dykkar og ikkje vera harde mot dei.

²⁰De born skal vera lydige mot foreldra dykkar i alle ting, for det er til hugnad for Herren.

²¹De fedrar skal ikkje stella dykk såleis med borna at dei vert arge og misser motet.

²²De trælar skal lyda dei jordiske herrane dykkar i alle ting. Ver ikkje augnetenarar, som berre vil gjera menneske til lags, men lyd dei av eit ærleg hjarta og i age for Herren.

²³Alt de gjer, skal de gjera viljug, som for Herren og ikkje for menneske.

²⁴For de veit at de skal få arven til løn av Herren. Kristus er den herren de skal tena.

²⁵Men den som gjer urett, skal få den løn han fortener. Her er det ikkje skilnad på folk.