Read nynorsk 1978 Kolossarane 4 Bible Online

Kolossarane 4 - nynorsk 1978 bible

Kolossarane 4

¹De som er herrar, skal fara rett og rimeleg fram mot trælane dykkar, for de veit at de òg har ein herre i himmelen.

²Ver vedhaldande i bøn, vak og bed og takka Gud!

³Bed for oss òg, at Gud må opna ei dør for Ordet, så vi kan forkynna Kristi løyndom, den eg no sit i fengsel for.

⁴Bed om at eg må få gjera han kjend som eg skal.

⁵Ver visleg når de er saman med dei som står utanfor, og kjøp den laglege tid.

⁶Lat alltid orda dykkar vera venlege, men lat dei ha salt og kraft, så de veit å gje kvar og ein det rette svaret.

⁷Tykikus kjem til å fortelja dykk alt om korleis det går med meg. Han er ein kjær bror og ein trufast tenar og medarbeidar for Herren.

⁸Eg sender han til dykk nett for at de skal få høyra korleis det er med oss, og for at han skal setja nytt mot i dykk.

⁹Saman med han sender eg Onesimus, den trufaste og kjære bror som er frå dykkar by. Desse to kan fortelja dykk alt herifrå.

¹⁰Aristark, som er fange saman med meg, helsar dykk, og det same gjer Markus, syskenbarnet til Barnabas. De har fått bod om han; ta vel imot han om han kjem.

¹¹Jesus, som har tilnamnet Justus, helsar òg. Desse tre er dei einaste jødekristne som har arbeidt saman med meg for Guds rike, og dei har vore til stor trøyst for meg.

¹²Epafras, som kjem frå dykkar eigen kyrkjelyd, helsar dykk. Han er ein Kristi Jesu tenar og strider alltid for dykk i bøn, så de kan verta ståande, fullmogne og fullt visse i alt som er Guds vilje.

¹³Eg gjev han det vitnemålet at han strevar og arbeider for dykk og for dei i Laodikea og Hierapolis.

¹⁴Den kjære Lukas, lækjaren, helsar dykk; det same gjer Demas.

¹⁵Helsa brørne i Laodikea, like eins Nymfa og kyrkjelyden som samlast heime hjå henne.

¹⁶Når dette brevet er opplese hjå dykk, syt då for at det òg vert opplese for kyrkjelyden i Laodikea, og at de sjølve får lesa det brevet mitt som de får frå Laodikea. [3]

¹⁷Sei til Arkippus: Akta på den tenesta du har fått for Herren, så du fullfører henne.

¹⁸Eg, Paulus, skriv mi helsing med eiga hand. Kom i hug lekkjene mine! Nåden vere med dykk!