Read nynorsk 1978 1. Tessalonikar 3 Bible Online

1. Tessalonikar 3 - nynorsk 1978 bible

1. Tessalonikar 3

¹Då vi ikkje kunne halda dette ut lenger, sette vi oss føre å vera åleine att i Aten,

²og vi sende Timoteus til dykk, vår bror og Guds medarbeidar i tenesta for Kristi evangelium. Han skulle styrkja dykk i trua og setja mot i dykk,

³så ingen skulle vera ustø i desse trengslene. De veit då sjølve at det er oss pålagt.

⁴Då vi var hjå dykk, sa vi dykk føreåt at vi kom til å få trengsler. Såleis gjekk det òg, som de veit.

⁵Og då eg ikkje heldt det ut lenger, sende eg han av stad. Eg måtte vita korleis det stod til med trua dykkar, om freistaren hadde greitt å freista dykk, så arbeidet vårt var nyttelaust.

⁶Men no er Timoteus nett attkomen frå dykk med ein god bodskap om dykkar tru og kjærleik. Han fortel at de alltid har oss i venleg minne og lengtar etter å sjå oss att, liksom vi lengtar etter dykk.

⁷Så vart vi då, brør, trøysta ved dykkar tru i all vår naud og trengsle.

⁸Og no lever vi, for de står faste i Herren.

⁹Korleis kan vi så takka Gud for dykk som vi burde, takka for all den gleda som fyller oss for Guds åsyn, og som de har gjeve oss?

¹⁰Natt og dag bed vi inderleg om å få sjå dykk att, og bøta på det som enno vantar i dykkar tru.

¹¹Måtte Gud, vår Far, og Jesus, vår Herre, styra vår veg til dykk!

¹²Og måtte Herren gje dykk meir og meir kjærleik til kvarandre og til alle, som vi òg har kjærleik til dykk!

¹³Så skal han styrkja hjarto dykkar, og de skal stå ulastande og heilage for Gud, vår Far, når vår Herre Jesus kjem med alle sine heilage. [3]