Read nynorsk 1978 1. Tessalonikar 4 Bible Online

1. Tessalonikar 4 - nynorsk 1978 bible

1. Tessalonikar 4

¹Elles, brør, bed og påminner vi dykk i Herren Jesus: De har teke imot og lært av oss korleis de skal leva og vera til hugnad for Gud, og såleis lever de alt. Men de må gjera endå større framsteg i dette!

²De veit då kva bod vi gav dykk frå Herren Jesus.

³For dette er Guds vilje — dykkar helging: De skal halda dykk frå hor;

⁴kvar og ein skal vita å vinna seg si eiga kone i heilagdom og ære,

⁵ikkje i sanseleg lyst som heidningane, som ikkje kjenner Gud.

⁶Og ingen må gjera bror sin urett eller lura han på nokon måte. Herren straffar alt slikt, som vi før har sagt og lagt dykk på hjarta.

⁷For Gud kalla oss ikkje til ureinskap, men til eit heilagt liv.

⁸Den som då avviser dette, han avviser ikkje eit menneske, men Gud, som gjev dykk sin Heilage Ande.

⁹Om kjærleiken til brørne treng vi ikkje skriva til dykk, for de har sjølve lært av Gud å elska kvarandre.

¹⁰Og de syner denne kjærleiken mot alle brørne i heile Makedonia. Men vi legg dykk på hjarta, brør, at de må gjera endå større framsteg i det.

¹¹De skal setja dykkar ære i å leva eit roleg liv, passa pliktene dykkar og arbeida med hendene, som vi har sagt dykk.

¹²Då kan de ferdast sømeleg mellom dei som er utanfor, og de treng ikkje hjelp av nokon.

¹³Vi vil ikkje, brør, at de skal vera uvitande om dei som er avsovna; for de skal ikkje syrgja som dei andre, dei som er utan von.

¹⁴For så sant vi trur at Jesus døydde og stod opp, så skal òg Gud ved Jesus føra dei avsovna saman med han.

¹⁵Dette seier vi dykk med eit ord frå Herren: Vi som no lever og vert att til dess Herren kjem, skal ikkje koma i førevegen for dei som er avsovna.

¹⁶For når det bydande ropet lyder, når erkeengelen lyfter si røyst og Guds basun ljomar, då skal Herren sjølv stiga ned frå himmelen. Og dei som døydde i trua på Kristus, skal fyrst stå opp.

¹⁷Så skal vi som har vorte att og enno lever, saman med dei rykkjast opp i skyene, i lufta, og møta Herren. Og så skal vi alltid vera saman med Herren.

¹⁸Trøysta kvarandre med desse orda!