Read nynorsk 1978 1. Tessalonikar 5 Bible Online

1. Tessalonikar 5 - nynorsk 1978 bible

1. Tessalonikar 5

¹Men om tider og timar treng vi ikkje skriva til dykk, brør.

²For de veit godt at Herrens dag kjem som ein tjuv om natta.

³Når dei seier: «Fred og ingen fare», då kjem undergangen over dei, brått som riene over ei kvinne som skal føda. Og dei skal ikkje sleppa unna.

⁴Men de, brør, er ikkje i mørkret, så dagen skulle koma uventa på dykk som ein tjuv.

⁵For de er alle born av ljoset og born av dagen; vi høyrer ikkje natta eller mørkret til.

⁶Så lat oss ikkje sova som dei andre, men vaka og vera edrue!

⁷For dei som søv, dei søv om natta, og dei som drikk seg drukne, gjer det om natta.

⁸Men vi som høyrer dagen til, lat oss vera vakne, kledde med tru og kjærleik som brynje og med vona om frelse som hjelm.

⁹For Gud har ikkje etla oss til vreide, men til å vinna frelse ved vår Herre Jesus Kristus.

¹⁰Han døydde for oss, så vi, anten vi vaker eller søv, skal leva saman med han.

¹¹Difor må de setja mot i kvarandre og oppbyggja kvarandre, som de òg gjer.

¹²Vi bed dykk, brør, at de må skjøna på dei som arbeider mellom dykk, dei som er dykkar forstandarar i Herren og rettleier dykk.

¹³De skal elska dei og setja dei overlag høgt på grunn av den gjerning dei har. Hald fred med kvarandre!

¹⁴Vi legg dykk på hjarta, brør: Tal til rettes dei som lever eit vørdlaust liv, set mot i dei motlause, ta dykk av dei veike, ver langmodige mot alle!

¹⁵Sjå til at ingen løner vondt med vondt, men legg vinn på å gjera godt mot kvarandre, ja, mot alle!

¹⁶Ver alltid glade!

¹⁷Bed uavlatande!

¹⁸Takka Gud, kva som enn møter dykk! For det er Guds vilje med dykk i Kristus Jesus.

¹⁹Sløkk ikkje ut Anden!

²⁰Vanvørd ikkje profetord,

²¹men prøv alt, og hald fast på det gode!

²²Hald dykk frå vondskap av alle slag!

²³Må han sjølv, fredens Gud, helga dykk heilt igjennom. Og gjev at dykkar ånd og sjel og lekam må haldast uskadde, så de kan vera ulastande når vår Herre Jesus Kristus kjem!

²⁴Han som kallar dykk, er trufast; han skal gjera det.

²⁵Brør, bed for oss!

²⁶Helsa alle brørne med ein heilag kyss!

²⁷Eg byd dykk ved Herren at dette brevet vert opplese for alle brørne.

²⁸Vår Herre Jesu Kristi nåde vere med dykk!