Read nynorsk 1978 Josva 19 Bible Online

Josva 19 - nynorsk 1978 bible

Josva 19

¹Det andre loddet fall på Simeons-ætta, på Simeons-sønene og ættgreinene deira. Det landet dei fekk, låg midt i Juda-landet.

²Desse byane vart deira: Be’er-Sjeba, Sjeba, Molada,

³Hasar-Sjual, Bala, Esem,

⁴Eltolad, Betul, Horma,

⁵Siklag, Bet-Hammarkabot, Hasar-Susa,

⁶Bet-Lebaot og Sjaruhen, tretten byar med landsbyar,

⁷og Ajin, Rimmon, Eter og Asjan, fire byar med landsbyar,

⁸og alle landsbyane som låg ikring desse byane, heilt til Ba’alat-Be’er, Rama i Negev. Dette var det landet Simeons-sønene og ættgreinene deira fekk.

⁹Landet deira høyrde Juda til. Den delen som fall på Juda-sønene, var for stor for dei. Difor fekk Simeons-sønene landet sitt midt i deira.

¹⁰Det tredje loddet fall på Sebulons-sønene og ættgreinene deira. Det landet dei fekk, rakk til Sarid.

¹¹Grensa deira gjekk vestover opp til Marala, heldt fram langs Dabbesjet og nådde den elva som renn austanfor Jokneam.

¹²Frå Sarid svinga ho austover, mot soloppgangen, bort imot Kislot-Tabor-bygda, gjekk så til Daberat og opp til Jafia.

¹³Derifrå tok ho austover til Gat-Hefer og Et-Kasin, heldt fram til Rimmon og svinga så bort til Hannea.

¹⁴Så bøygde ho nordover til Hannaton og enda i Jiftah-El-dalen.

¹⁵Sebulon fekk byane Kattat, Nahalal, Sjimron, Jidala og Betlehem, i alt tolv byar med landsbyar.

¹⁶Dette var det landet Sebulons-sønene og ættgreinene deira fekk, med byar og landsbyar.

¹⁷Det fjerde loddet fall på Jissakar, på Jissakars-sønene og ættgreinene deira.

¹⁸I landet deira låg desse byane: Jisre’el, Hakkesulot, Sjunem,

¹⁹Hafarajim, Sjion, Anaharat,

²⁰Harabbit, Kisjon, Ebes,

²¹Remet, En-Gannim, En-Hadda og Bet-Passes.

²²Grensa gjekk frammed Tabor, Sjahasima og Bet-Sjemesj og enda i Jordan. I alt var det seksten byar med landsbyar.

²³Dette var det landet Jissakars-sønene og ættgreinene deira fekk, med byar og landsbyar.

²⁴Det femte loddet fall på Asjers-sønene og ættgreinene deira.

²⁵I landet deira låg desse byane: Helkat, Hali, Beten, Aksjaf,

²⁶Alammelek, Amad og Misjal. Grensa nådde i vest til Karmel og Sjikor-Libnat.

²⁷Der svinga ho austover til Bet-Dagon, nådde til Sebulon, heldt fram nordover til Jiftah-El-dalen, så til Bet-Ha’emek og Ne’iel og til Kabul i nord.

²⁸Så heldt ho fram til Ebron, Rehob, Hammon og Kana, og heilt bort til Stor-Sidon.

²⁹Der svinga ho mot Rama og heldt fram til Tyrus-borga. Så gjekk ho i ein boge om Hosa og nådde ut til havet. Her låg byane Mehalleb, Aksib,

³⁰Umma, Afek og Rehob, i alt tjueto byar med landsbyar.

³¹Dette var det landet Asjers-sønene og ættgreinene deira fekk, med byar og landsbyar.

³²Det sjette loddet fall på Naftali, Naftali-sønene og ættgreinene deira.

³³Det landet dei fekk, nådde frå Helef, frå Sa’anannim-eika, om Adami-Hannekeb og Jabne’el, heldt fram til Lakkum og gjekk ut i Jordan.

³⁴Der svinga grensa mot vest til Asnot-Tabor og heldt fram til Hukkok. I sør grensa landet til Sebulon, i vest til Asjer, og i aust var Jordan grensa.

³⁵I Naftali låg desse festningsbyane: Hassiddim, Ser, Hammat, Rakkat, Kinneret,

³⁶Adama, Rama, Hasor,

³⁷Kedesj, Edre’i, En-Hasor,

³⁸Jiron, Migdal-El, Horem, Bet-Anat og Bet-Sjemesj, i alt nitten byar med landsbyar.

³⁹Dette var det landet Naftali-sønene og ættgreinene deira fekk, med byar og landsbyar.

⁴⁰Det sjuande loddet fall på Dans-sønene og ættgreinene deira. [19]

⁴¹I landet deira låg desse byane: Sora, Esjta’ol, Ir-Sjemesj,

⁴²Sja’alabbin, Ajjalon, Jitla,

⁴³Elon, Timna, Ekron,

⁴⁴Elteke, Gibbeton, Ba’alat,

⁴⁵Jehud, Bene-Berak, Gat-Rimmon,

⁴⁶Me-Hajjarkon, Harakkon og landet bort imot Jaffa.

⁴⁷Men det vart for trongt for Dans-sønene i landet deira. Difor drog dei opp til Lesjem, gjekk til åtak på byen og tok han. Dei drap folket i Lesjem med sverd, la byen under seg og busette seg der. I staden for Lesjem kalla dei han Dan etter ættefar sin. [20]

⁴⁸Dette var det landet Dans-sønene og ættgreinene deira fekk, med byar og landsbyar.

⁴⁹Då israelittane vel hadde skift ut landet, stykke for stykke, lét dei Josva Nunsson få ei odelseige mellom seg.

⁵⁰Dei gjorde som Herren hadde sagt, og gav han den byen han bad om, Timnat-Serah på Efraims-fjellet. Han bygde byen opp att og busette seg der.

⁵¹Dette var dei lutene av landet som presten Elasar, Josva Nunsson og ættehovdingane i Israel delte ut ved loddkasting. Det vart gjort i Sjilo, for Herrens åsyn, framfor møteteltdøra. Dermed var dei ferdige med å skifta ut landet.