Read nynorsk 1978 Josva 22 Bible Online

Josva 22 - nynorsk 1978 bible

Josva 22

¹Då kalla Josva til seg Rubens-sønene, Gads-sønene og halve Manasse-ætta

²og sa til dei: «De har gjort alt det som Moses, Herrens tenar, baud dykk, og meg har de òg lydt i eitt og alt.

³I heile denne lange tida, til i dag, har de ikkje vike frå brørne dykkar. De har halde dykk trufast etter det som Herren dykkar Gud sa dykk.

⁴Og no har Herren dykkar Gud late brørne dykkar få ro, som han lova dei. Far no heim att til telta dykkar, til det landet som Moses, Herrens tenar, gav dykk til odel og eige på hi sida av Jordan.

⁵Men legg vinn på å leva etter det bodet og den lova som Moses, Herrens tenar, gav dykk, at de skal elska Herren dykkar Gud og alltid gå på hans vegar, så de lever etter hans bod, held dykk til han og tener han av heile dykkar hjarta og heile dykkar hug.»

⁶Så velsigna Josva dei og bad farvel med dei, og dei fór heim att til telta sine.

⁷Moses hadde gjeve den eine halvparten av Manasse-ætta land i Basan. Og Josva hadde gjeve den andre halvparten land vestanfor Jordan saman med brørne deira. Som no Josva skildest med dei og velsigna dei,

⁸sa han til dei: «No fer de heim att med store rikdomar, med mykje fe, med sølv og gull, kopar og jern og ei mengd med klede. Del no med landsmennene dykkar det hærfanget de har teke frå fienden!»

⁹Så tok dei på heimveg, Rubens-sønene og Gads-sønene og halve Manasse-ætta. Dei skildest med dei andre israelittane i Sjilo i Kanaan og fór til sitt eige land, til Gilead, der dei hadde slege seg ned, så som Herren hadde lova gjennom Moses.

¹⁰Då Rubens-sønene, Gads-sønene og halve Manasse-ætta kom til landet ved Jordan, i Kanaan, bygde dei eit altar der attmed Jordan, eit altar så stort at ein kunne sjå det langan lei.

¹¹Dei andre israelittane fekk høyra at desse ættene hadde bygt eit altar i landet ved Jordan, nær grensa mot Kanaan, på hi sida av det området som høyrde israelittane til.

¹²Då dei høyrde det, samla heile folket seg i Sjilo og ville gå til krig mot dei.

¹³Men fyrst sende israelittane Pinhas, son til presten Elasar, til Gilead, til Rubens-sønene, Gads-sønene og halve Manasse-ætta.

¹⁴Og saman med han sende dei ti hovdingar, ein for kvar ætt i Israel. Kvar av dei var leiar for si ætt mellom Israels mange tusen.

¹⁵Dei kom til Rubens-sønene, Gads-sønene og halve Manasse-ætta i Gilead og sa til dei:

¹⁶Så seier heile Herrens lyd: Kva er dette for truløyse de har vist mot Israels Gud, med di de no har vendt dykk bort frå Herren og bygt dykk eit altar? Kvifor har de sett dykk opp mot Herren?

¹⁷Var det ikkje nok med det brotet vi gjorde oss skuldige i ved Bet-Peor? Det har vi enno ikkje reinsa oss for, og det har ført ulukke over Herrens lyd.

¹⁸Og så vil de atter venda dykk bort frå Herren! Men set de dykk opp mot Herren i dag, kjem han i morgon til å la heile Israels-folket få kjenna sin harme.

¹⁹Synest de at det er ureint, det landet de har fått til eigedom, så kom berre over til Herrens eige land, der Herrens bustad står, og få dykk eigedom mellom oss! Men set dykk ikkje opp mot Herren og mot oss, med di de byggjer dykk eit altar attåt altaret åt Herren vår Gud. [22]

²⁰Kom ikkje Herrens harme over heile Israels-folket den gongen Akan Serahson fór med svik og tok av det som var bannlyst? Og han var ikkje den einaste som laut døy for det brotet han hadde gjort.

²¹Då tok Rubens-sønene, Gads-sønene og halve Manasse-ætta til ords og sa til Israels ættehovdingar:

²²Herren, den mektige Gud, ja, Herren, den mektige Gud, han veit det, og Israel skal vita det: Det var ikkje i trass og truløyse mot Herren

²³vi bygde oss eit altar, og ikkje fordi vi ville venda oss bort frå Herren. Var det det, så gjev du ikkje må hjelpa oss i dag! Heller ikkje bygde vi det for å ofra brennoffer eller grødeoffer eller for å bera fram måltidsoffer på det. Var det så, då gjev at Herren må straffa oss for det!

²⁴Men det var ein ting vi var redde då vi gjorde dette: Vi tenkte at borna dykkar ein gong kunne koma til å seia til våre born: «Kva har de med Herren, Israels Gud, å gjera?

²⁵Har ikkje Herren sett Jordan til grense mellom oss og dykk, de Rubens- og Gads-søner! De har ingen del i Herren.» Såleis kunne borna dykkar få våre born til å halda opp med å ottast Herren.

²⁶Difor sa vi: Lat oss gå i gang og byggja eit altar! Vi vil ikkje bera fram brennoffer og slaktoffer der.

²⁷Men det skal vera eit vitne for oss og dykk og for dei ættene som kjem etter oss, om at vi vil tena Herren med brennoffera, slaktoffera og måltidsoffera våre. Så skal ikkje borna dykkar ein gong seia til våre born at dei ikkje har del i Herren.

²⁸Vi tenkte at dersom dei nokon gong skulle seia så til oss eller etterkomarane våre, då vil vi svara: «Sjå på den etterlikninga av Herrens altar som fedrane våre har laga, ikkje til å ofra brennoffer og slaktoffer på, men til eit vitne for oss og for dykk.»

²⁹Aldri kunne det falla oss inn at vi skulle setja oss opp mot Herren og venda oss bort frå han og byggja eit altar til brennoffer, grødeoffer og slaktoffer, attåt det altaret åt Herren vår Gud som står framfor bustaden hans.

³⁰Då presten Pinhas og leiarane i folket og ættehovdingane i Israel som var med han, høyrde kva Rubens-sønene, Gads-sønene og Manasse-sønene sa, syntest dei godt om det.

³¹Og presten Pinhas, son til Elasar, sa til Rubens-sønene, Gads-sønene og Manasse-sønene: «No skjønar vi at Herren er midt imellom oss, sidan de ikkje har sett dykk opp mot han med dette. Dermed har de berga israelittane frå Herrens hand.»

³²Så skildest presten Pinhas, son til Elasar, og dei andre leiarane med Rubens-sønene og Gads-sønene. Dei fór heim att frå Gilead til Kanaan og fortalde israelittane kva dei hadde høyrt.

³³Og israelittane syntest godt om svaret. Dei lova Gud og tenkte ikkje meir på å gå til strid mot Rubens-sønene og Gads-sønene og øydeleggja det landet dei budde i.

³⁴Rubens-sønene og Gads-sønene kalla altaret «Vitne»; dei sa: «Det skal vera eit vitne for oss om at Herren er Gud.»