Read nynorsk 1978 2. Tessalonikar 3 Bible Online

2. Tessalonikar 3 - nynorsk 1978 bible

2. Tessalonikar 3

¹Elles, brør, bed for oss at Herrens ord må ha stor framgang og koma til ære, liksom hjå dykk!

²Og bed om at vi må verta berga frå vrange og vonde menneske; for det er ikkje alle som trur.

³Men Herren er trufast; han skal styrkja dykk og vara dykk frå det vonde.

⁴Og Herren har gjeve oss den tillit til dykk at de gjer og kjem til å gjera det vi byd dykk.

⁵Gjev Herren må leia dykk fram til Guds kjærleik og Kristi tolmod!

⁶Vi byd dykk, brør, i Herren Jesu Kristi namn at de held dykk borte frå kvar bror som lever eit vørdlaust liv og ikkje rettar seg etter den læra de fekk av oss.

⁷De veit sjølve korleis de skal leva om de vil ha oss til føredøme. For vi levde ikkje eit latmannsliv hjå dykk

⁸og lét ikkje nokon halda oss maten utan vederlag. Vi arbeidde natt og dag; vi streva og sleit, så vi ikkje skulle vera nokon av dykk til tyngsle.

⁹Vi har nok full rett til livsopphald, men vi ville gje dykk eit føredøme, så de kunne gå i våre fotefar.

¹⁰For då vi var hjå dykk, gav vi dykk dette påbodet: Den som ikkje vil arbeida, skal heller ikkje eta.

¹¹Vi høyrer nemleg at nokre av dykk ikkje har skikk på livet sitt; dei passar ikkje arbeidet sitt, men driv med unyttige ting.

¹²Slike brør byd og påminner vi i Herren Jesu Kristi namn at dei skal arbeida i stilla og eta sitt eige brød.

¹³Men de, brør, vert ikkje trøytte av å gjera det som rett er!

¹⁴Og er det nokon som ikkje vil retta seg etter det vi har sagt i dette brevet, skal de bita dykk merke i han. Ha ikkje noko med han å gjera, så han kan gå i seg sjølv.

¹⁵Men hald han ikkje for ein fiende; tal han til rettes som ein bror.

¹⁶Må han, fredens Herre, gje dykk sin fred, alltid og på alle måtar. Herren vere med dykk alle!

¹⁷Denne helsinga skriv eg, Paulus, med eiga hand. Dette er kjennemerket i kvart brev. Slik er mi handskrift.

¹⁸Vår Herre Jesu Kristi nåde vere med dykk alle!