Read nynorsk 1978 1. Timoteus 2 Bible Online

1. Timoteus 2 - nynorsk 1978 bible

1. Timoteus 2

¹Så legg eg dykk framfor alt på hjarta at de ber fram bøner og forbøner, påkalling og takk for alle menneske.

²Bed for kongar og alle som er i høg stilling, så vi kan leva eit stilt og roleg liv i gudsfrykt og vinna vørdnad.

³Dette er godt og hugnadleg for Gud, vår frelsar,

⁴han som vil at alle menneske skal verta frelste og læra sanninga å kjenna.

⁵For det er éin Gud og éin mellommann mellom Gud og menneske: mennesket Kristus Jesus,

⁶han som gav seg sjølv til løysepeng for alle. Det var vitnemålet hans då tida var komen;

⁷og for det vart eg sett til herold og apostel. Dette er sant, eg lyg ikkje. Eg er ein lærar for folkeslag i tru og sanning. [1]

⁸Eg vil at mennene alle stader der dei held bøn, skal lyfta reine hender, utan sinne og trette. [2]

⁹Like eins vil eg at kvinnene skal ha ei fin framferd. Dei skal ikkje pynta seg utfordrande, men sømeleg, ikkje med allslags flettingar, gullsmykke, perler eller dyre klede.

¹⁰Deira prydnad skal vera gode gjerningar; det sømer seg for kvinner som vil leva etter Guds vilje.

¹¹Ei kvinne skal ta imot læra teiande; ho skal underordna seg.

¹²Eg gjev ikkje ei kvinne lov til å vera lærar eller rå over mannen; ho skal halda seg still.

¹³For Adam vart skapt fyrst, og så Eva.

¹⁴Og Adam vart ikkje forført, men kvinna lét seg forføra og braut bodet.

¹⁵Men ho skal verta frelst, gjennom si barnefødsle, berre ho held fast på tru, kjærleik og helging, og lever som det sømer seg.