Read nynorsk 1978 1. Timoteus 3 Bible Online

1. Timoteus 3 - nynorsk 1978 bible

1. Timoteus 3

¹Dette er eit truverdig ord: Om nokon vil ha eit tilsynsembete, har han hug på ei gjæv gjerning.

²Difor skal ein tilsynsmann vera ulastande, mann til éi kvinne, edrueleg, visleg, høvisk, gjestmild, dugeleg til å læra frå seg,

³ikkje drikkekjær eller hardhendt, men mild, ikkje stridshuga eller pengekjær.

⁴Han skal styra sitt eige hus godt, så borna hans er lydige og viser vørdnad.

⁵Men greier han ikkje styra sitt eige hus, kor kan han då ha omsut for Guds kyrkje?

⁶Han må ikkje vera nyomvend, for då kunne han verta hovmodig og koma under same domen som djevelen.

⁷Han må ha godt ord på seg mellom dei som står utanfor, så han ikkje vert spotta og fell i djevelens snare.

⁸Like eins skal diakonane vera vørde menn, som ikkje talar med to tunger, ikkje ligg under for drikk og ikkje er ute etter låk vinning.

⁹Dei skal eiga løyndomen i trua i eit reint samvit.

¹⁰Men dei òg skal prøvast fyrst, og dersom det ikkje er noko å seia på dei, kan dei setjast til tenesta.

¹¹Like eins skal kvinnene vera vel vørde, ikkje fara med baktale, men vera edruelege og pålitelege i alt.

¹²Ein diakon skal vera mann til éi kvinne, og han skal vera ein god far og husbond.

¹³For diakonar som har gjort ei god teneste, vinn seg ei akta stilling og får stort frimod i trua på Kristus Jesus.

¹⁴Dette skriv eg til deg, endå eg vonar å koma attende om ikkje så lenge.

¹⁵Men skulle det drya, vil eg at du skal vita korleis ein skal ferdast i Guds hus, som er den levande Guds kyrkje, sannings støtte og grunnvoll.

¹⁶Det må alle sanna at løyndomen i vår gudstru er stor: Han vart openberra ¬i menneskeskapnad, vann sin rett i Anden, vart sedd av englar, forkynt for folkeslag, trudd i verda, oppteken i herlegdom.