Read nynorsk 1978 1. Timoteus 4 Bible Online

1. Timoteus 4 - nynorsk 1978 bible

1. Timoteus 4

¹Anden seier med klåre ord at i dei siste tider skal somme falla frå trua. Dei skal halda seg til ånder som fører vilt, og til lærdomar som kjem frå vonde makter.

²Dei vert narra av hyklarar som fer med lygn og er brennemerkte i sitt eige samvit.

³Dei nektar folk å gifta seg og krev at ein skal halda seg frå visse slag mat, den som Gud har skapt til å verta motteken med takk av dei som trur og kjenner sanninga.

⁴For alt det Gud har skapt, er godt, og ingen ting treng vrakast når det vert motteke med takk.

⁵Det vert helga med Guds ord og bøn.

⁶Når du lærer brørne dette, er du ein god Kristi Jesu tenar som nærer seg av det ordet som skaper tru, og av den gode læra, som du alltid har fylgt.

⁷Men vis frå deg dei ugudelege mytane, som berre er tom tale. Øv deg heller i gudsfrykt.

⁸For kroppsleg øving er ikkje gagnleg til mykje, men gudsfrykt er gagnleg til alt. Ho ber i seg lovnad både for dette livet og for det som kjem.

⁹Det er eit truverdig ord, vel verdt å ta imot.

¹⁰Difor er det vi arbeider og strider. For vi har sett vår von til den levande Gud, han som er frelsar for alle menneske, men fyrst og fremst for dei som trur.

¹¹Dette skal du byda og læra.

¹²Lat ingen vanvørda deg fordi du er ung, men ver eit føredøme for dei truande i ord og gjerning, i kjærleik, truskap og reinleik.

¹³Ta deg serskilt av skriftlesinga, forkynninga og opplæringa, til dess eg kjem.

¹⁴Forsøm ikkje den nådegåva som er i deg, den du fekk ved profetord då eldsterådet la hendene på deg.

¹⁵Ta deg av alt dette, lev i det, så alle kan sjå at du gjer framsteg.

¹⁶Gjev akt på deg sjølv og lærargjerninga di! Hald fram med det! For når du det gjer, skal du frelsa både deg sjølv og dei som høyrer deg.