Read nynorsk 1978 2. Timoteus 3 Bible Online

2. Timoteus 3 - nynorsk 1978 bible

2. Timoteus 3

¹Du skal vita at i dei siste dagane skal det koma tunge tider.

²Då skal folk vera eigenkjærlege og pengekjære, skrytande, hovmodige, spottsame, ulydige mot foreldre, utakksame og utan age for det heilage,

³ukjærlege og uforsonlege, baktalande og utan sjølvtøyming, råe, likesæle om det gode,

⁴svikefulle, oppfarande og store i seg sjølve. Dei elskar lystene sine meir enn Gud.

⁵Dei har skin av gudlegdom, men fornektar hans kraft. Vend deg bort frå slike folk!

⁶Mellom dei er det nokre som lurer seg inn i heimane og får makt over kvinner som er tyngde av synder og lèt seg driva av mange slag lyster,

⁷og som alltid vil læra, men aldri kan læra sanninga å kjenna.

⁸Liksom Jannes og Jambres sette seg opp mot Moses, set desse mennene seg opp mot sanninga. Dei har fått dømekrafta øydelagd, og korkje dei eller trua deira held mål.

⁹Men no skal dei ikkje ha meir framgang. For det skal verta klårt for alle kor vitlause dei er; det skal gå dei som det gjekk Jannes og Jambres.

¹⁰Du har fylgt meg i lære og liv, i forsett, tru, langmod, kjærleik og tolmod,

¹¹og i forfylging og liding, som det eg vart ute for i Antiokia, Ikonium og Lystra. Ja, kva har eg ikkje mått tola av forfylgingar! Men Herren har fria meg ut or dei alle.

¹²Alle som vil leva eit gudfryktig liv i trua på Kristus Jesus, skal verta forfylgde.

¹³Men vonde menneske og svindlarar går frå vondt til verre; dei fører vilt og fer vilt.

¹⁴Men hald du fast på det du har lært og er overtydd om; du veit kven du har lært det av.

¹⁵Og heilt frå barndomen har du kjent dei heilage skriftene, som kan gjera deg vis til frelse ved trua på Kristus Jesus.

¹⁶Alle skrifter som er innanda av Gud, er òg gagnlege til opplæring, til formaning, til rettleiing, til oppseding i rettferd,

¹⁷så det menneske som høyrer Gud til, kan verta som det skal, dugande til all god gjerning.