Read nynorsk 1978 Titus 3 Bible Online

Titus 3 - nynorsk 1978 bible

Titus 3

¹Minn dei om at dei skal underordna seg styremaktene, retta seg etter dei og vera viljuge til å gjera alt som er godt.

²Dei må ikkje tala stygt om andre eller skapa strid, men vera milde og tolsame mot alle menneske.

³For vi var òg ein gong uvituge og ulydige, vi fór vilt og var trælar under mange slag lyster og ynske. Vi levde i vondskap og misunning, vart hata og bar hat til kvarandre.

⁴Men vår Gud og frelsar lét sin godleik og kjærleik til alle menneske verta openberra.

⁵Og han frelste oss, ikkje fordi vi hadde gjort rettferdige gjerningar, men fordi han er miskunnsam. Han frelste oss ved det badet som atterføder og fornyar ved Den Heilage Ande,

⁶som han i rikt mål har rent ut over oss ved Jesus Kristus, vår frelsar.

⁷Så skulle vi ved hans nåde stå rettferdige for Gud og verta arvingar til det evige livet, som er vår von.

⁸Dette er eit truverdig ord, og eg vil at du skal prenta inn det eg har sagt, så dei som er komne til tru på Gud, skal leggja vinn på å gjera gode gjerningar. Alt dette er godt og gagnleg for menneska.

⁹Men tåpelege stridsspørsmål, ættetavler og strid og krangel om spørsmål i lova skal du halda deg ifrå; slikt er gagnlaust og meiningslaust.

¹⁰Ein som fer med vrang lære, skal du tala til rettes, ein gong og to gonger, og så visa han frå deg.

¹¹Du kan vera trygg på at ein slik mann er på avvegar. Han syndar og har dømt seg sjølv.

¹²Når eg sender Artemas eller Tykikus til deg, må du skunda deg og koma til meg i Nikopolis; der har eg tenkt å vera vinteren over.

¹³Zenas, den lovkunnige, og Apollos skal du med omhug hjelpa i veg, så dei ikkje vantar noko.

¹⁴Våre folk òg lyt læra å gjera gode gjerningar når det måtte trengast, så livet deira ikkje skal vera utan frukt.

¹⁵Alle som er hjå meg, helsar deg. Helsa alle som elskar oss fordi vi har den same tru. Nåden vere med dykk alle!