Read nynorsk 1978 Filemon 1 Bible Online

Filemon 1 - nynorsk 1978 bible

Filemon 1

¹Paulus, Kristi Jesu fange, og Timoteus, bror vår, helsar Filemon, vår kjære medarbeidar,

²og Appia, syster vår, og Arkippus, vår medstridsmann, og kyrkjelyden som samlast i heimen din.

³Nåde vere med dykk og fred frå Gud, vår Far, og Herren Jesus Kristus!

⁴Eg takkar alltid min Gud når eg nemner deg i bønene mine.

⁵For eg høyrer om kjærleiken din til alle dei heilage og om trua di på Herren Jesus.

⁶Saman med dei eig du trua, og det er mi bøn at ho må vera verksam, så du kan skjøna kva godt vi skal gjera for Kristus.

⁷Det har vore ei stor glede og trøyst for meg å høyra om kjærleiken din, kjære bror, og dei heilage har kjent seg styrkte.

⁸I Kristus kunne eg nok med full rett påleggja deg å gjera di plikt.

⁹Men kjærleiken gjer at eg heller kjem med ei bøn. Slik som eg er, den gamle Paulus, men no òg Kristi Jesu fange,

¹⁰bed eg deg for Onesimus, son min som eg har fått i mitt fangenskap. [1]

¹¹Ein gong var han unyttig for deg, men no er han nyttig både for meg og deg.

¹²Når eg no sender han attende til deg, er det som om eg sender mitt eige hjarta.

¹³Eg hadde gjerne hatt han hjå meg, så han i din stad kunne hjelpa meg når eg no er i lekkjer for evangeliet.

¹⁴Men utan ditt samtykke ville eg ingen ting gjera, så du ikkje skal gjera det gode av tvang, men av fri vilje.

¹⁵Kan henda vart han teken frå deg for ei stund, så du skal få han att for alltid,

¹⁶ikkje lenger som træl, men meir enn ein træl, som ein kjær bror. Det er han sanneleg for meg. Kor mykje meir må han då ikkje vera det for deg, både som menneske og i Herren. [2]

¹⁷Så sant du held meg for ein bror i trua, så ta imot han som meg sjølv.

¹⁸Har han gjort deg urett, eller skuldar han deg noko, så før det på mi rekning!

¹⁹Dette skriv eg, Paulus, med eiga hand: Eg skal betala. Eg vil ikkje nemna det du skuldar meg: deg sjølv.

²⁰Ja, bror, lat meg ha gagn av deg i Herren! Gjer meg glad og frimodig i Kristus!

²¹I tiltru til din lydnad skriv eg dette til deg; eg er viss på at du vil gjera endå meir enn det eg bed deg om.

²²Og ein ting til: Stell til gjesteromet åt meg! For eg vonar Gud vil høyra bønene dykkar og la meg få koma til dykk.

²³Eg skal helsa deg frå Epafras, som er fange saman med meg for Kristi Jesu skuld,

²⁴like eins frå Markus, Aristark, Demas og Lukas, medarbeidarane mine.

²⁵Vår Herre Jesu Kristi nåde vere med dykkar ånd!