Read nynorsk 1978 Hebrearane 3 Bible Online

Hebrearane 3 - nynorsk 1978 bible

Hebrearane 3

¹Difor, heilage brør, de som har fått del i det himmelske kallet, sjå på den utsendingen og øvstepresten som vi vedkjennest, Jesus.

²Han var trufast mot den som gjorde han til det, liksom Moses var trufast i heile Guds hus.

³Jesus var verdig til å få større ære enn Moses, liksom ein byggmeister får større ære enn huset han byggjer.

⁴Eit hus må alltid vera bygt av einkvan; men den som har bygt alt, det er Gud.

⁵Moses var trufast i heile Guds hus, som tenar. Han skulle vitna om det som ein gong skulle forkynnast.

⁶Men Kristus var trufast som son, sett til å styra huset. Og hans hus er vi, så sant vi heilt til det siste held fast på frimodet og den vona vi rosar oss av.

⁷Difor, som Den Heilage Ande seier: I dag, om de høyrer hans røyst,

⁸så gjer ikkje hjarto dykkar ¬harde som den gongen fedrane ¬dykkar trassa meg, den dagen dei eggja meg ¬i øydemarka.

⁹Der eggja dei meg og sette meg på prøve,

¹⁰endå dei hadde sett ¬mine gjerningar i førti år. Difor fekk eg uvilje ¬mot denne ætta og sa: Dei fer alltid vilt ¬i sitt hjarta, dei kjenner ikkje mine vegar.

¹¹Så svor eg i min vreide: Dei skal aldri koma inn ¬til mi kvile!

¹²Sjå til, brør, at ikkje nokon av dykk har eit vondt, vantruande hjarta, så han fell frå den levande Gud.

¹³Set mot i kvarandre kvar dag så lenge det heiter «i dag», så ikkje nokon av dykk skal la seg dåra av synda og verta forherda.

¹⁴For vi har fått del i Kristus. Lat oss berre heilt til enden halda fast på det grunnlaget som vi hadde i den fyrste tida.

¹⁵Når det heiter: I dag, om de høyrer hans røyst, så gjer ikkje hjarto dykkar ¬harde som den gongen dei trassa meg,

¹⁶kven var det då som høyrde, men likevel var trassige? Var det ikkje alle dei som Moses hadde ført ut or Egypt?

¹⁷Kven var det han hadde uvilje mot i førti år? Var det ikkje dei som synda og fall døde om i øydemarka?

¹⁸Og kven var det han meinte då han svor at dei ikkje skulle koma inn til hans kvile? Var det ikkje dei som var ulydige?

¹⁹Så ser vi at det var vantru som gjorde at dei ikkje kunne koma inn.