Read nynorsk 1978 Hebrearane 5 Bible Online

Hebrearane 5 - nynorsk 1978 bible

Hebrearane 5

¹Ein øvsteprest vert alltid teken blant menneske og innsett til å gjera teneste for menneske framfor Gud. Han skal bera fram gåver og offer for synder.

²Han kan vera mild mot dei som feilar og fer vilt, av di han sjølv ligg under vesaldom

³og difor må bera fram syndoffer for seg sjølv og ikkje berre for folket.

⁴Ingen tek seg sjølv den æra, men han vert kalla av Gud liksom Aron.

⁵Så har heller ikkje Kristus teke seg den æra å vera øvsteprest. Han fekk henne av Gud som sa til han: Du er son min, eg har født deg i dag.

⁶Og som han seier ein annan stad: Du skal vera prest til evig tid på Melkisedeks vis.

⁷Då Jesus levde på jorda, bar han med høge rop og tårer fram bøner og naudrop til Gud som kunne berga han frå døden, og han vart bønhøyrd fordi han hadde age for Gud.

⁸Endå han var Son, lærte han lydnad av det han leid.

⁹Då han hadde nått fullendinga, vart han opphav til evig frelse for alle som lyder han;

¹⁰Gud hadde då kalla han øvsteprest på Melkisedeks vis.

¹¹Om dette har vi mykje å seia, men det er vanskeleg å forklara sidan de har vorte så trege til å høyra.

¹²Etter så lang tid burde de sjølve vore lærarar, men de treng einkvan som atter lærer dykk dei fyrste og grunnleggjande ting i Guds ord. De må ha mjølk og toler ikkje fast føde.

¹³For den som får mjølk, ser ikkje djupt inn i bodskapen om rettferd; han er umogen.

¹⁴Men fast føde er for dei mogne, for dei som med øving har vant sansane til å skilja mellom godt og vondt.