Read nynorsk 1978 Jakob 2 Bible Online

Jakob 2 - nynorsk 1978 bible

Jakob 2

¹Mine brør, de kan ikkje tru på vår Herre Jesus Kristus, herlegdomens Herre, og samstundes gjera skil på folk.

²Set at det kjem to menn inn i kyrkjelyden vår — den eine i fine klede og med gullring på fingeren, den andre fattig og i skitne klede.

³Så seier de til han i dei fine kleda: «Kom hit og finn deg ein god plass!» Men til den fattige seier de: «Du kan stå der,» eller: «Set deg her på golvet ved føtene mine!» Om de berre bryr dykk om han i fine klede,

⁴gjer de ikkje då skil på folk? Har de ikkje vorte domarar med vonde tankar?

⁵Høyr no, mine kjære brør: Har ikkje Gud valt ut dei som denne verda reknar for fattige, til å vera rike i trua og arva det riket han har lova dei som elskar han?

⁶Men de har vanvørdt den fattige! Er det ikkje dei rike som held dykk nede og dreg dykk fram for domstolen?

⁷Er det ikkje dei som spottar det gode namnet som er nemnt over dykk?

⁸Dersom de oppfyller den kongelege lov i Skrifta: Du skal elska nesten din som deg sjølv, då gjer de rett.

⁹Men gjer de skil på folk, syndar de, og lova klagar dykk som lovbrytarar.

¹⁰For den som held heile lova, men bryt eitt av bodorda, han har gjort seg skuldig i brot på alle.

¹¹For han som sa: «Du skal ikkje bryta ekteskapet», han sa òg: «Du skal ikkje slå i hel». Om du då ikkje bryt ekteskapet, men slår i hel, så har du vorte ein lovbrytar.

¹²De skal dømast etter fridoms lov, og i samsvar med det må de leva, i ord og i gjerning.

¹³For domen skal vera utan miskunn mot den som ikkje har vist miskunn. Men miskunn rosar seg mot domen.

¹⁴Mine brør! Kva gagnar det om nokon seier at han har tru, når han ikkje har gjerningar? Kan vel trua frelsa han?

¹⁵Set at ein bror eller ei syster ikkje har klede og vantar mat for dagen,

¹⁶og ein av dykk seier til dei: «Far vel, kled dykk varmt og et dykk mette!» Kva hjelper det, om de ikkje gjev dei det kroppen treng?

¹⁷Sameleis er det med trua: Har ho ikkje gjerningar, er ho beint fram død.

¹⁸Einkvan kan seia: «Den eine har tru, den andre har gjerningar.» Vis meg di tru utan gjerningar, så skal eg visa deg mi tru av mine gjerningar.

¹⁹Du trur at Gud er éin? Det gjer du rett i. Dei vonde åndene trur det same — og skjelv!

²⁰Veit du ikkje, du tankelause menneske, at tru utan gjerningar er gagnlaus?

²¹Var det ikkje gjerningar som gjorde at Abraham, far vår, vart sagd rettferdig då han ofra Isak, son sin, på altaret?

²²Der ser du: Trua verka saman med gjerningane hans, og gjennom gjerningane vart trua fullenda.

²³På den måten vart det skriftordet oppfylt: Abraham trudde Gud, og difor rekna Gud han for rettferdig, og han vart kalla «Guds ven».

²⁴Der ser de at eit menneske vert sagt rettferdig ved gjerningar og ikkje berre ved tru.

²⁵Sameleis var det med skjøkja Rahab: Vart ikkje ho sagd rettferdig ved gjerningar fordi ho tok imot sendemennene og sleppte dei ut or byen ein annan veg?

²⁶For liksom kroppen er død utan ånd, er trua død utan gjerningar.