Read nynorsk 1978 Jakob 3 Bible Online

Jakob 3 - nynorsk 1978 bible

Jakob 3

¹Mine brør! Ikkje mange av dykk bør verta lærarar; for de veit at vi skal få dess strengare dom.

²Alle misfer vi oss ofte. Den som ikkje misfer seg i ord, er ein fullkomen mann som greier å styra heile lekamen.

³Vi legg beisel i munnen på hesten så han skal lystra oss, og då kan vi styra heile hesten.

⁴Ja, jamvel store skip som vert drivne av sterke vindar, kan styrast med eit lite ror dit styrmannen vil.

⁵Sameleis er det med tunga: Ho er ein liten lem, men kan skryta av store ting. Tenk på at ein liten eld kan setja den største skog i brann!

⁶Men tunga er òg ein eld. Som ei verd av vondskap har ho sin plass blant lemene våre. Ho smittar heile lekamen og set livsens hjul i brann, men vert sjølv sett i brann av helvete. [3]

⁷Mennesket er slik skapt at det kan temja alle andre skapningar, både ville dyr og fuglar, krypdyr og fiskar.

⁸Men tunga kan ikkje noko menneske temja, ustyrleg og vond som ho er, full av drepande gift.

⁹Med henne lovprisar vi Herren og Faderen, og med henne forbannar vi menneska som er skapte i Guds bilete.

¹⁰Or same munnen kjem det både lovprising og forbanning. Såleis må det ikkje vera, mine brør!

¹¹Kan det vel strøyma både friskt og beiskt vatn or same kjelda?

¹²Mine brør, kan eit fikentre bera oliven, eller eit vintre bera fiken? Like lite kan ei salt kjelde gje ferskt vatn.

¹³Er nokon av dykk vis og vitug, må han syna det i gjerning, i eit rett liv merkt av den tolsemd som visdomen gjev.

¹⁴Men ber de på bitter misunning og sjølvhevding i hjarta, då har de ikkje noko å rosa dykk av. Lyg ikkje mot sanninga!

¹⁵Ein slik visdom kjem ikkje ovanfrå, men er jordisk, reint menneskeleg, ja djevelsk.

¹⁶For der misunning og sjølvhevding rår, der er det ugreie og alt det som vondt er.

¹⁷Men visdomen ovanfrå er fyrst og fremst rein, dinest fredsæl, mild og ettergjevande, rik på miskunn og gode frukter, upartisk og ærleg.

¹⁸Og rettferds frukt vert sådd i fred, og veks fram for dei som skaper fred.