Read nynorsk 1978 Jakob 5 Bible Online

Jakob 5 - nynorsk 1978 bible

Jakob 5

¹Og no, de rike! Gråt og jamra over all den ulukke som ventar dykk!

²Rikdomen dykkar rotnar, og kleda vert mòletne;

³gullet og sølvet rustar bort, og rusta skal vitna mot dykk og eta dykkar kjøt som eld. De har nytta endetida til å samla rikdom.

⁴Men høyr: Den løna de heldt att for dei som skar åkrane dykkar, ropar høgt, og klageropet frå onnefolket har nått fram til Herren Sebaot.

⁵I vellivnad og overflod har de levt på jorda og gjort hjarto dykkar feite til slaktedagen.

⁶Den rettferdige har de dømt og drepe, og ingen gjer motstand mot dykk.

⁷Ver då tolmodige, brør, til dess Herren kjem! Ein bonde må venta med tolmod på den dyre grøda som jorda gjev, til både haustregnet og vårregnet har falle.

⁸Så må de òg vera tolmodige og ved godt mot, for Herren kjem snart.

⁹Hald opp med å klaga på kvarandre, brør, elles vert de dømde. Domaren står alt for døra.

¹⁰Brør, ta profetane til føredøme, dei som tala i Herrens namn; dei heldt tolmodig ut når dei måtte lida vondt.

¹¹Og sæle prisar vi alle som held ut. De har høyrt korleis Job heldt ut og har sett korleis Herren lét det gå han til sist. For Herren er rik på medkjensle og miskunn.

¹²Men framfor alt, brør, må de ikkje sverja, korkje ved himmelen eller jorda eller ved noko anna. Lat eit ja vera ja og eit nei vera nei, så de ikkje skal koma under domen!

¹³Er det nokon av dykk som har det vondt? Då skal han be. Er nokon ved godt mot? Då skal han syngja lovsongar.

¹⁴Er nokon av dykk sjuk, skal han kalla til seg dei eldste i kyrkjelyden, og dei skal be over han og salva han med olje i Herrens namn.

¹⁵Då skal bøna, beden i tru, berga den sjuke, og Herren skal reisa han opp. Og har han gjort synder, skal han få dei tilgjevne.

¹⁶Sanna då syndene for kvarandre og bed for kvarandre, så de kan verta lækte. Rettferdig manns bøn har stor kraft og verknad.

¹⁷Elia var eit menneske under same kår som vi. Han bad at det ikkje skulle regna, og det regnde ikkje i landet på tre år og seks månader.

¹⁸Så bad han på nytt, og himmelen gav regn, og jorda bar atter si grøde.

¹⁹Mine brør! Om ein av dykk fer vilt og kjem bort frå sanninga, og ein annan fører han attende,

²⁰då skal de vita: Den som får ein syndar til å venda om frå sine ville vegar, han bergar ei sjel frå døden og løyner ei mengd med synder.