Read nynorsk 1978 2. Peter 1 Bible Online

2. Peter 1 - nynorsk 1978 bible

2. Peter 1

¹Simeon Peter, Jesu Kristi tenar og apostel, helsar dei som ved vår Gud og frelsar Jesu Kristi rettferd har fått den same dyre tru som vi.

²Nåde og fred vere med dykk i rikt mål gjennom kunnskapen om Gud og vår Herre Jesus!

³Då vi lærte han å kjenna som kalla oss ved sin eigen herlegdom og styrke, gav han oss i si guddommelege makt alt som tener til liv og gudsfrykt.

⁴Dermed har han gjeve oss dei dyraste og største lovnader; ved dei skulle de få del i guddommeleg natur etter at de har sloppe bort frå oppløysinga i verda, den som kjem av lystene.

⁵Gjer difor alt de kan så trua viser seg i eit rett liv, og det rette livet i skjøn,

⁶skjønet i sjølvtøyming, sjølvtøyminga i tolmod, tolmodet i kristen livsferd,

⁷den kristne livsferda i brorskap og brorskapen i kjærleik.

⁸For når alt dette finst hjå dykk og får veksa, då vert de ikkje yrkeslause eller utan frukt i kunnskapen om vår Herre Jesus Kristus.

⁹Men den som ikkje har dette, han er nærsynt, ja, blind; han har gløymt at han er reinsa for sine førre synder.

¹⁰Difor, brør, må de setja endå meir inn på å gjera dykkar kall og utveljing fast. For gjer de dette, skal de aldri falla.

¹¹Då skal de få ein fri og open inngang i vår Herre og frelsar Jesu Kristi evige rike.

¹²Difor vil eg alltid minna dykk om dette, endå de kjenner til det og er grunnfeste i den sanninga som har kome til dykk.

¹³Eg meiner at det er rett å halda dykk vakne med slike påminningar, så lenge eg er i denne lekams telt.

¹⁴For eg veit at det snart skal leggjast bort; det har vår Herre Jesus Kristus late meg vita.

¹⁵Og det er om å gjera for meg at de alltid skal minnast dette, når eg er borte.

¹⁶For det var ikkje oppdikta eventyr vi fór med då vi kunngjorde dykk vår Herre Jesu Kristi makt og kome. Nei, vi var augnevitne som såg hans guddommelege velde.

¹⁷For Gud Fader gav han ære og herlegdom den gongen røysta kom til han frå høgste herlegdomen: «Dette er Son min, han som eg elskar, han som eg har hugnad i.»

¹⁸Vi høyrde sjølve denne røysta koma frå himmelen, då vi var saman med han på det heilage fjellet.

¹⁹Difor står profetordet dess fastare for oss. Og dette ordet gjer de vel i å akta på; det er eit ljos som skin på ein mørk stad, til dagen strålar fram og morgonstjerna går opp i hjarto dykkar.

²⁰Men framom alt skal de vita at ingen kan tyda eit profetord i Skrifta på eiga hand.

²¹For aldri er noko profetord framkome ved menneskevilje; men drivne av Den Heilage Ande tala menneske ord frå Gud.