Read nynorsk 1978 1. Johannes 2 Bible Online

1. Johannes 2 - nynorsk 1978 bible

1. Johannes 2

¹Mine born, dette skriv eg til dykk, så de ikkje skal synda. Men om nokon syndar, har vi ein talsmann hjå Faderen, Jesus Kristus, Den Rettferdige.

²Og han er ei soning for syndene våre, ja, ikkje berre for våre, men for alle i heile verda.

³Og på dette veit vi at vi kjenner han: om vi held boda hans.

⁴Den som seier at han kjenner han, men ikkje held boda hans, er ein lygnar, og sanninga er ikkje i han.

⁵Men den som held ordet hans, i han har kjærleiken til Gud vorte fullenda. Av dette veit vi at vi er i han.

⁶Den som seier at han er i han, må leva som Jesus levde.

⁷De kjære! Det er ikkje eit nytt bod eg skriv til dykk, men eit gamalt bod som de har hatt frå fyrste stund. Dette gamle bodet er det ordet de har høyrt.

⁸Likevel er det eit nytt bod eg kjem med, fordi det no har vorte røyndom i han og mellom dykk. For mørkret kverv, og det sanne ljoset skin alt no.

⁹Den som seier at han er i ljoset, men hatar bror sin, han er enno i mørkret.

¹⁰Den som elskar bror sin, er i ljoset, og han fører ingen til fall.

¹¹Men den som hatar bror sin, er i mørkret og ferdast i mørkret. Han veit ikkje kvar han går, for mørkret har blinda augo hans.

¹²Eg skriv til dykk, mine born, fordi de har fått syndene tilgjevne for hans namn skuld.

¹³Eg skriv til dykk, fedrar, fordi de kjenner han som er frå opphavet. Eg skriv til dykk, de unge, fordi de har vunne over den vonde.

¹⁴Eg skriv til dykk, mine born, fordi de kjenner Faderen. Eg skriv til dykk, fedrar, fordi de kjenner han som er frå opphavet. Eg skriv til dykk, de unge, fordi de er sterke. Guds ord vert verande i dykk, og de har vunne over den vonde.

¹⁵Elska ikkje verda og heller ikkje det som er i verda! Den som elskar verda, har ikkje kjærleiken til Faderen i seg.

¹⁶For alt her i verda, sanseleg lyst, augnelyst og hovmod fordi ein er rik, det er ikkje av Faderen, men av verda.

¹⁷Verda forgår med all si lyst, men den som gjer Guds vilje, vert verande til evig tid.

¹⁸Mine born, den siste tida er komen. De har høyrt at Antikrist skal koma, og mange antikristar har alt stått fram. Av dette skjønar vi at den siste tida er komen.

¹⁹Dei har gått ut frå oss, men dei var ikkje av oss. Hadde dei vore av oss, hadde dei vorte verande hjå oss. Såleis skulle det syna seg at ikkje alle er av oss.

²⁰Men de er salva av Den Heilage, og alle har de kunnskap. [1]

²¹Så skriv eg ikkje til dykk fordi de ikkje kjenner sanninga, men fordi de kjenner henne og veit at inga lygn kjem frå sanninga.

²²Og kven er lygnaren, om ikkje den som nektar at Jesus er Kristus? Han er Antikrist, han som fornektar Faderen og Sonen.

²³Den som fornektar Sonen, har heller ikkje samfunn med Faderen. Den som vedkjennest Sonen, har samfunn med Faderen òg.

²⁴Lat det då verta verande i dykk, det som de har høyrt frå fyrst av. For dersom det vert verande i dykk, det som de har høyrt frå fyrst av, vert de òg verande i Sonen og Faderen.

²⁵Og dette er det han har lova oss: det evige livet.

²⁶Når eg skriv dette, tenkjer eg på dei som fører dykk vilt.

²⁷Men de har fått salving av han; ho vert verande i dykk, og de treng ikkje til at nokon lærer dykk. For hans salving lærer dykk alt og er sannferdig og utan lygn. Vert difor verande i han, så som de har lært.

²⁸Ja, mine born, ver i han! Då kan vi vera frimodige når Kristus openberrar seg, og ikkje verta bortviste med skam når han kjem att.

²⁹De veit at han er rettferdig, og då skjønar de at den som lever rett, er fødd av han.