Read nynorsk 1978 1. Johannes 3 Bible Online

1. Johannes 3 - nynorsk 1978 bible

1. Johannes 3

¹Sjå kor stor kjærleik Faderen har synt oss: Vi skal kallast Guds born. Og det er vi. Difor kjenner ikkje verda oss, fordi ho ikkje kjenner han.

²De kjære, no er vi Guds born; og det er enno ikkje openberra kva vi skal verta. Vi veit at når han openberrar seg, skal vi verta han like, for vi skal sjå han som han er.

³Kvar den som har denne vona til han, reinsar seg, liksom Kristus er rein.

⁴Den som syndar, bryt lova, for synd er lovbrot.

⁵Og de veit at han openberra seg for å ta bort syndene våre, han som sjølv er utan synd.

⁶Den som er i han, lever ikkje i synd. Den som syndar, har ikkje sett han og ikkje kjent han.

⁷Mine born, lat ingen føra dykk vilt! Den som lever rett, han er rettferdig, liksom Kristus er rettferdig.

⁸Den som syndar, er av djevelen, for djevelen har synda frå opphavet. Og det var for å gjera ende på djevelens verk at Guds Son openberra seg.

⁹Den som er fødd av Gud, syndar ikkje. For det sædet Gud har lagt ned i han, er i han; han kan ikkje synda lenger, fordi han er fødd av Gud.

¹⁰Såleis syner det seg kven som er Guds born og kven som er djevelens born: Den som ikkje lever rett og ikkje elskar bror sin, han er ikkje av Gud.

¹¹For dette er den bodskapen de har høyrt frå fyrste stund: Vi skal elska kvarandre.

¹²Vi må ikkje vera som Kain; han var av den vonde og drap bror sin. Og kvifor drap han broren? Fordi hans eigne gjerningar var vonde, men dei bror hans gjorde, var rettferdige.

¹³De må ikkje undra dykk, brør, om verda hatar dykk.

¹⁴Vi veit at vi har gått over frå døden til livet, vi som elskar brørne. Den som ikkje elskar, er enno i døden.

¹⁵Den som hatar bror sin, er ein mordar, og de veit at ingen mordar har evig liv i seg.

¹⁶Kva kjærleik er, har vi lært av at Jesus gav livet for oss. Så er det vår skyldnad å gje livet for brørne.

¹⁷Men den som har meir enn nok å leva av, og likevel lèt att hjarta sitt når han ser bror sin lida naud, korleis kan han ha Guds kjærleik i seg?

¹⁸Mine born, lat oss elska, ikkje med tome ord, men i gjerning og sanning!

¹⁹På dette skal vi vita at vi er av sanninga, og så skal vi roa hjarto våre for hans åsyn.

²⁰For jamvel om hjarta vårt fordømer oss, er Gud større enn hjarta og veit alt.

²¹De kjære, dersom hjarta vårt ikkje fordømer oss, har vi frimod for Gud.

²²Og det vi bed om, skal vi få av han, for vi held hans bod og gjer det som er til hugnad for han.

²³Og dette er hans bod: Vi skal tru på namnet åt Son hans, Jesus Kristus, og elska kvarandre, så som han baud oss.

²⁴Den som held hans bod, vert verande i Gud og Gud i han. Og at han er i oss, det veit vi fordi han har gjeve oss sin Ande.