Read nynorsk 1978 1. Johannes 4 Bible Online

1. Johannes 4 - nynorsk 1978 bible

1. Johannes 4

¹De kjære, tru ikkje kvar ei ånd! Prøv åndene om dei er av Gud! For mange falske profetar har gått ut i verda.

²På det kjenner de Guds Ande: Kvar ånd som sannar at Jesus Kristus er komen i kjøt og blod, er av Gud.

³Men kvar ånd som ikkje vedkjennest Jesus, er ikkje av Gud. Det er ånda til Antikrist, som de har høyrt skal koma. Og ho er alt i verda.

⁴Men de, mine born, er av Gud, og har sigra over dei. For han som er i dykk, er større enn han som er i verda.

⁵Dei er av verda, difor er òg deira tale av verda, og verda høyrer på dei.

⁶Men vi er av Gud, og den som kjenner Gud, høyrer på oss. Den som ikkje er av Gud, høyrer ikkje på oss. Såleis kan vi skilja sannings-ånda frå villfarings-ånda.

⁷De kjære, lat oss elska kvarandre! For kjærleiken er frå Gud, og den som elskar, er fødd av Gud og kjenner Gud.

⁸Den som ikkje elskar, har aldri kjent Gud, for Gud er kjærleik.

⁹Og Guds kjærleik vart openberra mellom oss då han sende sin einborne Son til verda så vi skulle ha liv ved han.

¹⁰Kjærleiken er ikkje det at vi har elska Gud, men at han har elska oss og sendt Son sin til soning for syndene våre.

¹¹De kjære, har Gud elska oss så, då er vi òg skuldige å elska kvarandre.

¹²Ingen har nokon gong sett Gud, men dersom vi elskar kvarandre, vert Gud verande i oss, og hans kjærleik har vorte fullenda i oss.

¹³At vi er i han, og han i oss, det veit vi fordi han har gjeve oss av sin Ande.

¹⁴Og vi har sett og vitnar at Faderen har sendt Sonen til frelsar for verda.

¹⁵Den som sannar at Jesus er Guds Son, i han vert Gud verande og han i Gud.

¹⁶Vi har lært å kjenna den kjærleiken Gud har til oss, og vi har trutt på den. Gud er kjærleik, og den som vert verande i kjærleiken, vert verande i Gud og Gud i han.

¹⁷Det er målet som kjærleiken har for oss, at vi skal ha frimod på domedag; for som han er, slik er vi òg, midt i denne verda. Det finst ikkje otte i kjærleiken.

¹⁸Den fullkomne kjærleiken driv otten ut. For otten ber straffa i seg, og i den som ottast, har ikkje kjærleiken vorte fullenda.

¹⁹Vi elskar av di han elska oss fyrst.

²⁰Om nokon seier at han elskar Gud, men likevel hatar bror sin, då er han ein lygnar. Den som ikkje elskar bror sin, som han har sett, han kan ikkje elska Gud, som han ikkje har sett.

²¹Og dette er det bodet vi har frå han: Den som elskar Gud, må elska bror sin òg.