Read nynorsk 1978 Dommarane 10 Bible Online

Dommarane 10 - nynorsk 1978 bible

Dommarane 10

¹Etter Abimelek stod Tola fram og berga Israel. Han var son til Pua Dodoson av Jissakars-ætta, og budde i Sjamir på Efraims-fjellet.

²Han var domar i Israel i tjuetre år. Så døydde han og vart gravlagd i Sjamir.

³Etter han stod Ja’ir frå Gilead fram. Han var domar i Israel i tjueto år.

⁴Han hadde tretti søner; dei reid på tretti esel og åtte tretti teltbyar som enno i dag vert kalla Ja’irs teltbyar. Dei ligg i Gilead-landet.

⁵Då Ja’ir døydde, vart han gravlagd i Kamon.

⁶Men israelittane gjorde atter det som vondt var i Herrens augo. Dei dyrka Ba’al-gudane og Astarte-bileta og gudane åt folket i Aram, Sidon, Moab, Ammon og Filistarlandet. Dei vende seg frå Herren og ville ikkje tena han.

⁷Då vart Herren brennande harm på israelittane, og han gav dei i hendene på filistarane og ammonittane.

⁸Alt same året knuste dei israelittane og kua dei. I atten år trælka dei alle israelittane som budde austanfor Jordan, i amorittlandet, i Gilead.

⁹Ammonittane sette jamvel over Jordan og gjekk til strid mot Juda, Benjamin og Efraim. Og israelittane kom i stor naud.

¹⁰Då ropa israelittane til Herren og sa: «Vi har synda mot deg. Vi har vendt oss bort frå vår Gud og dyrka Ba’al-gudane.»

¹¹Herren svara: «Har eg ikkje berga dykk frå egyptarane, amorittane, ammonittane, filistarane,

¹²sidonarane, amalekittane og midjanittane? Då dei plaga dykk, ropa de til meg, og eg berga dykk ut or hendene deira.

¹³Men de vende dykk bort frå meg og dyrka andre gudar. Difor vil eg ikkje hjelpa dykk meir.

¹⁴Gå og kalla på dei gudane som de har valt! Lat dei frelsa dykk no når de er i naud.»

¹⁵Då sa israelittane til Herren: «Vi har synda. Gjer med oss som du synest, berre du vil hjelpa oss denne gongen!»

¹⁶Så skilde dei seg av med dei framande gudane og tente Herren. Då heldt han ikkje ut å sjå på Israels naud.

¹⁷Ammonittane samla seg til strid og slo leir i Gilead. Israelittane fylka seg og slo leir i Mispa.

¹⁸Då sa folket og hovdingane i Gilead til kvarandre: «Kvar er den mannen som vil gå fyrst i striden mot ammonittane? Han skal vera hovding over alle som bur i Gilead.»