Read nynorsk 1978 Dommarane 12 Bible Online

Dommarane 12 - nynorsk 1978 bible

Dommarane 12

¹Mennene i Efraim samla seg til strid og drog nordetter. Dei sa til Jefta: «Kvifor sende du ikkje bod etter oss så vi kunne ha vore med då du drog av stad og ville strida mot ammonittane? No vil vi setja eld på huset du bur i.» [16]

²Jefta svara: «Eg og folket mitt låg i hard strid med ammonittane. Då sende eg bod på dykk, men de hjelpte meg ikkje imot dei.

³Og då eg såg at de ikkje ville hjelpa, våga eg livet og gjekk imot ammonittane, og Herren gav dei i hendene mine. Kvifor kjem de no farande og vil slåst med meg?»

⁴Så samla Jefta alle mennene i Gilead til strid mot Efraim. Og Gilead-mennene hogg efraimittane ned; for dei hadde sagt: «De er rømingar frå Efraim, de Gilead-folk. De høyrer heime i Efraim, men bur i Manasse.»

⁵Gilead-mennene stengde vadestadene over Jordan for efraimittane. Kvar gong det kom ein efraimitt som hadde rømt, og ville sleppa over, spurde dei: «Er du frå Efraim?» Svara han då nei,

⁶sa dei til han: «Sei sjibbolet!» Men sa han «sibbolet», fordi han ikkje kunne seia ordet rett, så greip dei han og drap han der ved vadestadene over Jordan. Den gongen fall det førtito tusen mann av Efraims-ætta. [17]

⁷Jefta frå Gilead var domar i Israel i seks år. Så døydde han og vart gravlagd i heimbyen sin i Gilead.

⁸Etter Jefta var Ibsan frå Betlehem domar i Israel. [18]

⁹Han hadde tretti søner. Tretti døtrer gifte han bort, og tretti sonekoner henta han heim. Han styrte Israel i sju år.

¹⁰Så døydde Ibsan og vart gravlagd i Betlehem.

¹¹Etter han vart Elon frå Sebulon domar i Israel. Han styrte Israel i ti år.

¹²Så døydde Elon og vart gravlagd i Ajjalon i Sebulons-landet.

¹³Etter han vart Abdon Hillelson frå Piraton domar i Israel.

¹⁴Han hadde førti søner og tretti sonesøner. Dei reid på sytti eselfolar. Han styrte Israel i åtte år.

¹⁵Så døydde Abdon Hillelson frå Piraton og vart gravlagd i Piraton i Efraims-landet, på amalekittfjellet.