Read nynorsk 1978 3. Johannes 1 Bible Online

3. Johannes 1 - nynorsk 1978 bible

3. Johannes 1

¹Den eldste helsar den kjære Gaius, som eg elskar hjarteleg.

²Kjære ven, mest av alt ynskjer eg at du må få vera frisk og ha det godt, like godt som du har det åndeleg.

³Eg vart inderleg glad då nokre av brørne kom og fortalde kor trufast du er mot sanninga; den lever du i.

⁴Ikkje noko gleder meg meir enn å høyra at borna mine lever i sanninga.

⁵Kjære ven, du er trufast i all di gjerning for brørne, ja, jamvel for dei som er framande.

⁶I kyrkjelyden her har dei vitna om din kjærleik. Du gjer vel om du hjelper dei vidare på ferda, som rett er for Gud.

⁷Det var for å forkynna Namnet dei drog ut, og dei tek ikkje imot hjelp frå heidningane.

⁸Difor bør vi ta oss av dei, så vi kan vera medarbeidarar for sanninga.

⁹Eg har skrive nokre ord til kyrkjelyden. Men Diotrefes, som gjerne vil vera den fremste der, vil ikkje ha noko med oss å gjera.

¹⁰Når eg kjem, skal eg minna han om det han har gjort. For han fer med stygg baktale om oss. Men han nøyer seg ikkje med det. Sjølv nektar han å ta imot brørne, og når andre vil gjera det, hindrar han dei og støyter dei ut or kyrkjelyden.

¹¹Kjære ven, ta ikkje det vonde til føredøme, men det gode! Den som gjer det gode, er av Gud. Den som gjer det vonde, har ikkje sett Gud.

¹²Om Demetrius har alle berre godt å seia, ja, sanninga sjølv vitnar for han. Det same gjer vi, og du veit at vårt vitnemål er sant.

¹³Eg har enno mykje å seia deg, men vil ikkje gjera det i brev.

¹⁴For eg vonar å sjå deg snart, så vi kan tala saman.

¹⁵Fred vere med deg! Venene her helsar deg. Du må sjølv helsa venene, kvar einskild av dei.