Read nynorsk 1978 1. Samuelsbok 11 Bible Online

1. Samuelsbok 11 - nynorsk 1978 bible

1. Samuelsbok 11

¹Ammonitten Nakasj gjorde ei hærferd og kringsette Jabesj i Gilead. Då sa Jabesj-buane til han: «Gjer ei pakt med oss, så skal vi gje oss under deg.»

²Men ammonitten Nakasj svara: «Eg skal gjera ei pakt med dykk på den måten at eg stikk ut høgre auga på kvar av dykk, til vanære for heile Israel.»

³Då sa dei eldste i Jabesj til han: «Gjev oss ein frist på sju dagar, så vi kan senda bod rundt om i heile Israel. Er det då ingen som hjelper oss, skal vi gje oss over til deg.»

⁴Då sendemennene kom til Sauls Gibea og bar fram ærendet sitt for folket, sette heile folket i å gråta.

⁵I same stunda kom Saul heim frå åkeren og dreiv oksane føre seg. Han spurde kva som var i vegen med folket, sidan dei gret. Dei fortalde han kva mennene frå Jabesj hadde sagt.

⁶Då Saul høyrde det, kom Guds Ande over han, og han vart brennande harm.

⁷Han tok to oksar, hogg dei sund og sende stykka kring i heile Israel med bodberarar som skulle seia: «Så skal dei gjera med oksane åt den som ikkje fylgjer Saul og Samuel i striden.» Då kom det ei redsle frå Herren over folket, og dei drog ut, alle som ein.

⁸Han mønstra dei ved Besek. Det var 300 000 israelittar og 30 000 judearar.

⁹Så sa dei til bodberarane som var komne: «Sei til folket i Jabesj i Gilead: I morgon når sola tek til å heta, skal det koma hjelp til dykk.» Då bodberarane kom og fortalde Jabesj-buane dette, vart dei glade.

¹⁰Og dei sa til Nakasj: «I morgon skal vi gje oss over til dykk, så kan de gjera med oss som de synest.»

¹¹Dagen etter delte Saul folket i tre flokkar, og i morgonvakta braut dei inn i leiren og hogg ned ammonittane; dei heldt ikkje opp før midt på heitaste dagen. Dei som slapp unna, vart spreidde; det var ikkje att to mann på same staden.

¹²Då sa folket til Samuel: «Kven var det som sa: Skal Saul vera konge over oss? Hit med karane, så vi kan få drepa dei!»

¹³Men Saul sa: «På denne dagen skal ingen lata livet; for i dag har Herren gjeve Israel siger.»

¹⁴Og Samuel sa til folket: «Kom, lat oss fara til Gilgal og stadfesta kongedømet der!»

¹⁵Så fór alt folket til Gilgal, og der gjorde dei Saul til konge for Herrens åsyn. Dei bar fram måltidsoffer for Herrens åsyn, og Saul og alle israelittane gledde seg storleg.