Read nynorsk 1978 1. Samuelsbok 15 Bible Online

1. Samuelsbok 15 - nynorsk 1978 bible

1. Samuelsbok 15

¹Ein dag sa Samuel til Saul: «Det var meg Herren sende for å salva deg til konge over folket hans, over Israel. Lyd no Herrens ord!

²Så seier Herren, Allhærs Gud: Eg vil straffa amalekittane for det dei gjorde mot Israel, at dei la hindringar i vegen for israelittane då dei drog opp frå Egypt.

³Dra no ut og slå amalekittane, og bannlys alt det dei eig! Vis ikkje medkjensle, men drep menn og kvinner, småborn og spedborn, oksar og sauer, kamelar og esel!»

⁴Så kalla Saul folket til våpen og mønstra dei i Tela’im. Det var to hundre tusen mann, og av dei var ti tusen frå Juda. [34]

⁵Då Saul kom til byen åt amalekittane, la han folk i bakhald nede i dalen.

⁶Og til kenittane sa han: «Skil lag med amalekittane og dra bort, så eg ikkje gjer ende på dykk saman med dei. For de gjorde vel mot israelittane då dei drog opp frå Egypt.» Då skilde kenittane lag med amalekittane.

⁷Saul slo amalekittane og forfylgde dei frå Havila til bortimot Sjur, som ligg austanfor Egypt. [35] [36]

⁸Han fanga amalekittkongen Agag levande. Og alt folket bannstøytte han og hogg dei ned med sverd.

⁹Men Saul og mennene hans sparte Agag og det beste av småfeet og storfeet, gjøfeet og lamma. Dei sparte alt som var noko verdt, og ville ikkje bannstøyta det. Men alt fe som var ringt og verdilaust, det bannstøytte dei.

¹⁰Då kom Herrens ord til Samuel, og det lydde så:

¹¹«Eg angrar at eg gjorde Saul til konge; for han har vendt seg bort frå meg og ikkje halde seg etter mitt ord.» Då vart Samuel harm og ropa til Herren heile natta.

¹²Morgonen etter stod han tidleg opp og ville fara til møtes med Saul. Han fekk høyra at Saul var komen til Karmel og hadde reist seg eit minnesmerke der. Så hadde han snutt og fare nedetter til Gilgal. [37]

¹³Då Samuel kom til Saul, sa Saul til han: «Velsigna vere du av Herren! Eg har halde meg etter Herrens ord.»

¹⁴Men Samuel sa: «Kva er det då for bræking som læt for øyro mine, og kva er det for rauting eg høyrer?»

¹⁵Saul svara: «Det er nokre krøter dei har teke frå amalekittane og drive hit. Folket sparte det beste av småfeet og storfeet, av di dei ville ofra det til Herren din Gud; men resten har vi bannstøytt.»

¹⁶Då sa Samuel til Saul: «Hald opp, så skal eg kunngjera deg kva Herren tala til meg i natt.» «Tal!» svara Saul.

¹⁷Samuel sa: «Endå du har så små tankar om deg sjølv, er du likevel hovding over Israels-ættene! Herren har salva deg til konge over Israel.

¹⁸Sidan sende han deg i veg og sa: Gå og bannstøyt amalekittane, dette syndige folket, og strid mot dei til du har gjort ende på dei!

¹⁹Kvifor lydde du ikkje Herrens ord, men kasta deg over hærfanget og gjorde det som vondt var i Herrens augo?»

²⁰Saul svara: «Eg lydde Herrens ord og gjekk den vegen Herren sende meg. Eg førte Agag, amalekittkongen, hit og gjorde ende på amalekittane.

²¹Men folket tok noko småfe og storfe av hærfanget, det beste av det som var bannlyst, og ville ofra det til Herren din Gud her i Gilgal.»

²²Då sa Samuel: «Trur du Herren har hugnad i brennoffer og slaktoffer så som i lydnad ¬mot Herrens ord? Nei, lydnad er betre ¬enn slaktoffer, og viljug hug er betre ¬enn verefeitt.

²³Trass er jamgodt ¬med spådoms-synd, og stridlynde ¬er som avgudsdyrking. Fordi du har vraka Herrens ord, har han vraka deg som konge.»

²⁴Då sa Saul til Samuel: «Eg har synda; for eg har gjort imot Herrens ord og dine påbod. Eg var redd folket og gav etter for dei.

²⁵Kjære, tilgjev no synda mi, og ver med meg attende, så eg kan tilbe Herren.»

²⁶Men Samuel svara: «Eg vil ikkje vera med deg attende. For du har vraka Herrens ord, og Herren har vraka deg; du skal ikkje lenger vera konge over Israel.»

²⁷Dermed snudde han seg og ville gå. Men Saul treiv i snippen på kappa hans, så ho rivna.

²⁸Då sa Samuel til han: «I dag har Herren rive kongedømet over Israel frå deg og gjeve det til ein annan, ein som er betre enn du.

²⁹Han som er Israels ære, lyg ikkje og angrar ikkje. For han er ikkje eit menneske, så han skulle angra.»

³⁰Saul svara: «Eg har synda. Men vis meg likevel den ære framfor dei eldste i folket mitt og heile Israel at du er med meg attende! Så vil eg tilbe Herren din Gud.»

³¹Då gjekk Samuel med han attende, og Saul tilbad Herren.

³²Sidan sa Samuel: «Før Agag, amalekittkongen, hit til meg!» Skjelvande steig Agag fram for han og sa: «Sanneleg, beisk er døden!»

³³Men Samuel svara: «Som sverdet ditt ¬har gjort kvinner barnlause, skal mor di verta barnlaus, ¬framom andre kvinner.» Så hogg Samuel Agag ned for Herrens åsyn i Gilgal.

³⁴Med så gjort gav han seg på veg til Rama, og Saul fór heim att til Sauls Gibea.

³⁵Sidan ville ikkje Samuel sjå Saul meir så lenge han levde; for han syrgde over Saul. Men Herren angra at han hadde gjort Saul til konge over Israel.