Read nynorsk 2011 1. Mosebok 1 Bible Online

1. Mosebok 1 - nynorsk 2011 bible

1. Mosebok 1

¹[1] I opphavet skapte Gud himmelen og jorda.

²[2] Jorda var aud og tom, mørker låg over djupet, og Guds ande svevde over vatnet.

³Då sa Gud: «Det skal bli lys!» Og det vart lys.

⁴Gud såg at lyset var godt, og Gud skilde lyset frå mørkret.

⁵Gud kalla lyset dag, og mørkret kalla han natt. Og det vart kveld, og det vart morgon, første dagen.

⁶Gud sa: «Det skal bli ein kvelv midt i vatnet! Han skal skilja vatn frå vatn.»

⁷[3] Gud laga himmelkvelven og skilde vatnet som er under kvelven, frå vatnet som er over kvelven. Og slik vart det.

⁸Gud kalla kvelven himmel. Og det vart kveld, og det vart morgon, andre dagen.

⁹Gud sa: «Vatnet under himmelen skal samla seg på éin stad! Det tørre landet skal koma til syne.» Og slik vart det.

¹⁰Gud kalla det tørre landet jord, og vatnet som hadde samla seg, kalla han hav. Og Gud såg at det var godt.

¹¹Gud sa: «Jorda skal bli grøn! Grøne vekstar skal gro på jorda, planter som set frø, og frukttre som ber frukt med frø i, av alle slag.» Og slik vart det.

¹²Jorda bar fram grøne vekstar, planter som set frø, av alle slag, og tre som ber frukt med frø i, av alle slag. Og Gud såg at det var godt.

¹³Og det vart kveld, og det vart morgon, tredje dagen.

¹⁴Gud sa: «Det skal bli lys på himmelkvelven til å skilja dag frå natt! Dei skal vera teikn for høgtider, dagar og år.

¹⁵Dei skal vera lys på himmelkvelven og skina over jorda.» Og slik vart det.

¹⁶Gud laga dei to store lysa, det største lyset til å herska over dagen og det minste til å herska over natta, og stjernene.

¹⁷Gud sette dei på himmelkvelven til å lysa over jorda,

¹⁸til å herska over dagen og over natta og til å skilja lyset frå mørkret. Og Gud såg at det var godt.

¹⁹Og det vart kveld, og det vart morgon, fjerde dagen.

²⁰Gud sa: «Det skal kry av liv i vatnet! Fuglar skal flyga over jorda, oppunder himmelkvelven.»

²¹Og Gud skapte dei store sjødyra og kvar levande skapning av alle dei slag som vatnet yrer og kryr av, og alle slag fuglar med venger. Og Gud såg at det var godt.

²²Gud velsigna dei og sa: «Ver fruktbare og bli mange og fyll vatnet i havet! Og fuglane skal bli mange på jorda.»

²³Og det vart kveld, og det vart morgon, femte dagen.

²⁴Gud sa: «Jorda skal bera fram levande skapningar av alle slag: fe, kryp og villdyr av alle slag!» Og slik vart det.

²⁵Gud laga alle slag ville dyr og alle slag fe og krypet på marka av alle slag. Og Gud såg at det var godt.

²⁶[4] Gud sa: «Lat oss laga menneske i vårt bilete, så dei liknar oss! Dei skal råda over fiskane i havet og fuglane under himmelen, over feet og alle villdyra og alt kryp som det kryr av på jorda.»

²⁷[5] Og Gud skapte mennesket i sitt bilete, i Guds bilete skapte han det, som mann og kvinne skapte han dei.

²⁸Gud velsigna dei og sa til dei: «Ver fruktbare og bli mange, fyll jorda og legg henne under dykk! De skal råda over fiskane i havet og over fuglane under himmelen og over alle dyr som det kryr av på jorda.»

²⁹Og Gud sa: «Sjå, eg gjev dykk alle planter som set frø, så mange som finst på heile jorda, og alle tre som ber frukt med frø i. Det skal de ha å eta.

³⁰Og til alle dyr på jorda og til alle fuglar under himmelen og til alt som kryp på jorda, alt som har livsande i seg, gjev eg alle grøne planter å eta.» Og slik vart det.

³¹Gud såg på alt det han hadde gjort, og sjå, det var svært godt! Og det vart kveld, og det vart morgon, sjette dagen.