Read nynorsk 2011 1. Mosebok 11 Bible Online

1. Mosebok 11 - nynorsk 2011 bible

1. Mosebok 11

¹Heile verda hadde same språk og same ord.

²[50] Då dei braut opp frå aust, fann dei ein brei dal i landet Sinear og slo seg ned der.

³[51] Dei sa til kvarandre: «Kom, så lagar vi teglstein og brenner dei harde!» Dei brukte tegl til byggjestein og jordbek til å fuga med.

⁴[52] «Kom», sa dei, «lat oss byggja ein by og eit tårn som når opp til himmelen, og skaffa oss eit namn så vi ikkje blir spreidde ut over heile jorda!»

⁵Då steig HERREN ned for å sjå på byen og tårnet som menneska bygde.

⁶HERREN sa: «Sjå, dei er eitt folk, og eitt språk har dei alle. Og dette er det første dei gjer! No vil ingen ting vera umogleg for dei, same kva dei set seg føre.

⁷Kom, lat oss stiga ned og forvirra språket deira så den eine ikkje skjønar den andre!»

⁸Så spreidde HERREN dei derifrå ut over heile jorda, og dei heldt opp med å byggja på byen.

⁹[53] Difor kalla dei han Babel, for der forvirra HERREN språket for heile jorda. Og derifrå spreidde HERREN dei ut over heile jorda.

¹⁰Dette er slektshistoria til Sem. Då Sem var 100 år, fekk han sonen Arpaksjad, to år etter storflaumen.

¹¹Og etter at han hadde fått Arpaksjad, levde Sem endå 500 år og fekk søner og døtrer.

¹²Då Arpaksjad var 35 år, fekk han sonen Sjelah.

¹³Og etter at han hadde fått Sjelah, levde Arpaksjad endå 403 år og fekk søner og døtrer.

¹⁴Då Sjelah var 30 år, fekk han sonen Eber.

¹⁵Og etter at han hadde fått Eber, levde Sjelah endå 403 år og fekk søner og døtrer.

¹⁶Då Eber var 34 år, fekk han sonen Peleg.

¹⁷Og etter at han hadde fått Peleg, levde Eber endå 430 år og fekk søner og døtrer.

¹⁸Då Peleg var 30 år, fekk han sonen Re'u.

¹⁹Og etter at han hadde fått Re'u, levde Peleg endå 209 år og fekk søner og døtrer.

²⁰Då Re'u var 32 år, fekk han sonen Serug.

²¹Og etter at han hadde fått Serug, levde Re'u endå 207 år og fekk søner og døtrer.

²²Då Serug var 30 år, fekk han sonen Nahor.

²³Og etter at han hadde fått Nahor, levde Serug endå 200 år og fekk søner og døtrer.

²⁴Då Nahor var 29 år, fekk han sonen Tarah.

²⁵Og etter at han hadde fått Tarah, levde Nahor endå 119 år og fekk søner og døtrer.

²⁶[54] Då Tarah var 70 år, fekk han sønene Abram, Nahor og Haran.

²⁷Dette er slektshistoria til Tarah. Tarah fekk sønene Abram, Nahor og Haran. Og Haran fekk sonen Lot.

²⁸[55] Haran døydde hos Tarah, far sin, i fedrelandet sitt, Ur i Kaldea.

²⁹[56] Abram og Nahor tok seg koner. Kona til Abram heitte Sarai. Kona til Nahor heitte Milka og var dotter til Haran, far til Milka og Jiska.

³⁰Sarai var barnlaus, ho kunne ikkje få born.

³¹[57] Tarah tok med seg sonen Abram og sonesonen Lot, son til Haran, og svigerdottera Sarai, kona til son hans, Abram. Saman forlét dei Ur i Kaldea for å dra til landet Kanaan. Men då dei kom til Harran, slo dei seg ned der.

³²Tarah levde i 205 år. Så døydde Tarah i Harran.