Read nynorsk 2011 1. Mosebok 12 Bible Online

1. Mosebok 12 - nynorsk 2011 bible

1. Mosebok 12

¹HERREN sa til Abram: «Dra bort frå landet ditt og frå slekta di og frå farshuset ditt til det landet som eg skal syna deg!

²Eg vil gjera deg til eit stort folk. Eg vil velsigna deg og gjera namnet ditt stort. Du skal bli til velsigning.

³ Eg vil velsigna dei som velsignar deg, men den som forbannar deg, skal eg forbanna. I deg skal alle slekter på jorda velsignast.»

⁴Så tok Abram ut, som HERREN hadde sagt han, og Lot drog med han. Abram var 75 år gammal då han braut opp frå Harran.

⁵Og Abram tok med seg Sarai, kona si, og Lot, brorson sin, og alle eigedelane dei hadde samla seg, og folka dei hadde skaffa seg i Harran. Dei braut opp for å dra til landet Kanaan. Då dei kom til Kanaan,

⁶[58] drog Abram gjennom landet heilt til den heilage staden Sikem, til More-eika. Den gongen budde kanaanearane i landet.

⁷HERREN synte seg for Abram og sa: «Eg vil gje dette landet til di ætt.» Og der bygde Abram eit altar for HERREN, som hadde synt seg for han.

⁸[59] Derifrå flytte han opp i fjellandet aust for Betel og slo opp teltet sitt mellom Betel i vest og Ai i aust. Der bygde han eit altar for HERREN og kalla på HERRENS namn.

⁹[60] Sidan braut Abram opp og drog frå stad til stad mot Negev.

¹⁰Det var hungersnaud i landet. Då drog Abram ned til Egypt for å bu der som innflyttar, for nauda var stor i landet.

¹¹Då han nærma seg Egypt, sa han til kona si, Sarai: «Høyr på meg: Eg veit at du er ei vakker kvinne.

¹²Når egyptarane får sjå deg, kjem dei til å seia: Dette er kona hans. Så slår dei meg i hel og lèt deg leva.

¹³Kan du ikkje seia at du er syster mi? Så går det meg godt for di skuld, og eg får leva takka vere deg!»

¹⁴Då Abram kom til Egypt, såg egyptarane at kvinna var overlag vakker.

¹⁵Og stormennene til farao fekk sjå henne og lét vel om henne for han. Så vart kvinna henta til faraos hus.

¹⁶Og farao gjorde godt mot Abram for hennar skuld. Han fekk småfe, storfe og esel, slavar og slavekvinner, eselhopper og kamelar.

¹⁷Men HERREN lét svære plager råka farao og huset hans på grunn av Sarai, kona til Abram.

¹⁸Då kalla farao Abram til seg og sa: «Kva er det du har gjort mot meg? Kvifor fortalde du meg ikkje at ho er kona di?

¹⁹Kvifor sa du at ho er syster di, så eg tok henne til kone? Sjå, her har du kona di! Ta henne og gå!»

²⁰Farao sette nokre menn til å senda han bort saman med kona hans og alt han eigde.