Read nynorsk 2011 1. Mosebok 13 Bible Online

1. Mosebok 13 - nynorsk 2011 bible

1. Mosebok 13

¹Så drog Abram opp frå Egypt til Negev med kona si og alt det han eigde. Og Lot var med han.

²Abram var svært rik på buskap og på sølv og gull.

³Han drog frå stad til stad, frå Negev og heilt til Betel, til den staden der han før hadde hatt teltet sitt, mellom Betel og Ai,

⁴til staden der han hadde reist eit altar første gongen. Der kalla Abram på HERRENS namn.

⁵Også Lot, som drog saman med Abram, hadde småfe og storfe og telt.

⁶Men landet kunne ikkje fø dei når dei budde saman. For dei eigde så mykje at dei ikkje kunne bu saman.

⁷Så vart det strid mellom dei som gjette buskapen til Abram, og dei som gjette buskapen til Lot. Den gongen budde kanaanearane og perisittane i landet.

⁸Då sa Abram til Lot: «Det kan då ikkje vera strid mellom meg og deg og mellom mine gjetarar og dine! Vi er då slektningar.

⁹Ligg ikkje heile landet ope framfor deg? Skil heller lag med meg! Tek du til venstre, dreg eg til høgre, og tek du til høgre, dreg eg til venstre.»

¹⁰[61] Lot lyfte auga og såg at heile Jordan-sletta var rik på vatn. Heilt til Soar var ho som HERRENS hage, som landet Egypt. Dette var før HERREN hadde lagt Sodoma og Gomorra i øyde.

¹¹Så valde Lot seg heile Jordan-sletta og tok ut mot aust. Slik skildest dei frå kvarandre.

¹²Abram busette seg i landet Kanaan, medan Lot busette seg i byane på sletta og flytte med telta sine heilt til Sodoma.

¹³Menneska i Sodoma var vonde og synda grovt mot HERREN.

¹⁴ HERREN sa til Abram etter at Lot hadde skilt lag med han: «Lyft auga og sjå deg omkring frå den staden der du står, mot nord og sør, mot aust og vest!

¹⁵For heile det landet du ser, vil eg gje deg og di ætt for alltid.

¹⁶Eg lèt ætta di bli som støvet på jorda. Kan nokon telja støvet på jorda, skal di ætt òg kunna teljast.

¹⁷Stå opp og dra gjennom landet på langs og på tvers! For det er deg eg vil gje det til.»

¹⁸[62] Sidan flytte Abram omkring med telta sine. Han kom til Mamres eikelund ved Hebron. Der slo han seg ned og bygde eit altar for HERREN.