Read nynorsk 2011 1. Mosebok 15 Bible Online

1. Mosebok 15 - nynorsk 2011 bible

1. Mosebok 15

¹Etter at dette hadde hendt, kom HERRENS ord til Abram i eit syn: «Ver ikkje redd, Abram! Eg er ditt skjold. Løna di skal bli stor!»

²[66] Men Abram svara: «Herre, min GUD, kva vil du gje meg? For barnlaus går eg bort, og Elieser frå Damaskus er arving til huset mitt.»

³Og Abram sa: «Du har ikkje gjeve meg etterkomarar. Sjå, ein av husfolket mitt skal arva meg.»

⁴Då kom HERRENS ord til han: «Han skal ikkje arva deg, men ein av ditt eige kjøt og blod skal arva deg.»

⁵Så førte han Abram ut og sa til han: «Sjå opp mot himmelen og tel stjernene, om du kan telja dei!» Og han sa: «Så talrik skal ætta di bli.»

⁶Abram trudde HERREN, og det vart rekna han til rettferd.

⁷Og han sa til han: «Eg er HERREN, som førte deg ut frå Ur i Kaldea for å gje deg dette landet i arv.»

⁸Abram sa: «Herre, min GUD, korleis kan eg vita at eg skal få det i arv?»

⁹[67] Då svara han: «Hent meg ei treårs kvige, ei treårs geit og ein treårs vêr, ei turteldue og ein dueunge.»

¹⁰Abram henta alt dette til han, skar dyra i to og la delane rett mot kvarandre. Men fuglane skar han ikkje i to.

¹¹Rovfuglar slo ned på skrottane, men Abram dreiv dei bort.

¹²Då sola heldt på å gå ned, fall ein djup søvn over Abram. Og sjå, redsle og eit stort mørker fall over han.

¹³Og Gud sa til Abram: «Dette skal du vita: Ætta di skal bu som innflyttarar i eit land som ikkje er deira. Dei skal vera slavar og bli plaga av folket der i fire hundre år.

¹⁴Men det folket dei må slava for, vil eg òg dømma, og sidan skal dei dra ut med stort bytte.

¹⁵Sjølv skal du gå til fedrane dine i fred, i høg alder skal du bli gravlagd.

¹⁶I det fjerde slektsleddet skal dei koma tilbake hit. For syndeskulda til amorittane har enno ikkje fylt sitt mål.»

¹⁷[68] Sola gjekk ned, og det vart mørkt. Og sjå, ein rykande omn kom til syne, og ein flammande fakkel fór mellom kjøtstykka.

¹⁸[69] Den dagen gjorde HERREN ei pakt med Abram og sa: «Di ætt gjev eg dette landet, frå Egyptarelva heilt til Storelva, Eufrat,

¹⁹landet til kenittane, kenisittane og kadmonittane,

²⁰hetittane, perisittane og refaittane,

²¹[70] amorittane, kanaanearane, girgasjittane og jebusittane.»