Read nynorsk 2011 1. Mosebok 16 Bible Online

1. Mosebok 16 - nynorsk 2011 bible

1. Mosebok 16

¹Kona til Abram, Sarai, fødde han ingen born. Men ho hadde ei egyptisk slavekvinne som heitte Hagar.

²Sarai sa til Abram: «Høyr på meg: HERREN har hindra meg i å føda born. Gå no inn til slavekvinna mi! Kanskje får eg ein son ved henne.» Og Abram høyrde på det Sarai sa.

³Kona til Abram, Sarai, tok då den egyptiske slavekvinna si, Hagar, og gav henne til kone for Abram, mannen sin. Abram hadde då budd ti år i landet Kanaan.

⁴Han gjekk inn til Hagar, og ho vart med barn. Men då ho oppdaga at ho var med barn, såg ho ned på husfrua si.

⁵Då sa Sarai til Abram: «Det er di skuld at eg blir krenkt! Eg gav slavekvinna mi i din famn, men då ho oppdaga at ho var med barn, såg ho ned på meg. HERREN skal dømma mellom meg og deg!»

⁶Abram sa til Sarai: «Sjå, slavekvinna er i di hand. Gjer kva du vil med henne.» Og Sarai audmjuka henne, så ho rømde frå henne.

⁷[71] HERRENS engel fann henne ved ei vasskjelde i ørkenen, ved kjelda på vegen til Sjur.

⁸Han sa: «Hagar, Sarais slavekvinne, kvar kjem du frå, og kvar skal du av?» Ho svara: «Eg rømmer frå Sarai, husfrua mi.»

⁹Og HERRENS engel sa til henne: «Vend attende til husfrua di og lat deg audmjuka under hennar hand!»

¹⁰HERRENS engel sa: «Stor vil eg gjera ætta di, så stor at ingen kan telja henne.»

¹¹[72] Så sa HERRENS engel til henne: «Sjå, du er med barn og skal føda ein son. Han skal du kalla Ismael, for HERREN har høyrt at du vart audmjuka.

¹²Han skal bli eit villesel av eit menneske. Handa hans skal vera vend mot alle og alle hender mot han. Rett imot alle slektningane sine skal han slå seg ned.»

¹³Då sette ho dette namnet på HERREN som hadde tala til henne: «Du er ein gud som ser meg.» For ho sa: «Har eg her verkeleg sett han som ser meg?»

¹⁴[73] Difor blir brønnen kalla Lahai-Ro'i-brønnen. Han ligg mellom Kadesj og Bered.

¹⁵Så fødde Hagar ein son til Abram. Og Abram gav sonen som Hagar fødde, namnet Ismael.

¹⁶Abram var 86 år gammal då Hagar fødde Ismael til han.