Read nynorsk 2011 1. Mosebok 18 Bible Online

1. Mosebok 18 - nynorsk 2011 bible

1. Mosebok 18

¹ HERREN synte seg for Abraham i eikelunden i Mamre ein gong han sat i teltopninga då dagen var på det varmaste.

²Han såg opp og fekk auge på tre menn som stod framfor han. Då han såg dei, sprang han til møtes med dei frå teltopninga, bøygde seg til jorda

³og sa: «Herre, dersom eg har funne nåde for auga dine, så gå ikkje forbi tenaren din!

⁴Lat meg henta litt vatn, så de kan vaska føtene og kvila dykk her under treet!

⁵Og lat meg henta litt mat, så de kan styrkja dykk før de dreg vidare, sidan de no har lagt vegen forbi tenaren dykkar.» Dei svara: «Ja, gjer som du seier!»

⁶[78] Då skunda Abraham seg inn i teltet til Sara og sa: «Skund deg og kna tre sea fint mjøl og bak brødleivar!»

⁷Sjølv sprang han bort til storfeet og henta ein fin og god kalv. Den gav han til tenesteguten, som skunda seg og laga han til.

⁸Så tok han rømme og mjølk og den kalven som guten hadde gjort i stand, og sette det fram for dei. Og han vart ståande hos dei under treet medan dei åt.

⁹Då sa dei til han: «Kvar er Sara, kona di?» Abraham svara: «Der inne i teltet.»

¹⁰Han sa: «Eg kjem tilbake til deg når tida er inne, og då skal Sara, kona di, ha ein son.» Sara høyrde det i teltopninga, som var rett bak han.

¹¹Abraham og Sara var gamle, langt oppi åra, og Sara hadde det ikkje lenger på kvinners vis.

¹²Difor lo Sara med seg sjølv: «Skulle eg kjenna lyst, utsliten som eg er? Og herren min er òg gammal.»

¹³Då sa HERREN til Abraham: «Kvifor ler Sara og seier: Skulle eg verkeleg kunna føda, gammal som eg er?

¹⁴Er noko umogleg for HERREN? Eg kjem tilbake til deg når tida er inne, og då skal Sara ha ein son.»

¹⁵Sara nekta: «Eg lo ikkje.» For ho var redd. Men han svara: «Jau, du lo.»

¹⁶Mennene braut opp og vende blikket mot Sodoma. Abraham gjekk med for å sjå dei vel av stad.

¹⁷Då tenkte HERREN: «Skulle eg løyna for Abraham det eg vil gjera?

¹⁸Abraham skal då bli til eit stort og mektig folk, og i han skal alle folkeslag på jorda velsignast.

¹⁹Eg har valt han ut for at han skal by sønene og etterkomarane sine å halda seg til HERRENS veg og gjera det som er rett og rettferdig. Då kan HERREN gje Abraham det han har lova han.»

²⁰Og HERREN sa: «Høgt er klageropet over Sodoma og Gomorra, for synda der er svært stor.

²¹Klageropet har nådd meg. No vil eg stiga ned og sjå om dei verkeleg har handla så ille, og har dei ikkje det, vil eg vita det.»

²²Så gjekk mennene derifrå, dei tok vegen mot Sodoma. Men Abraham vart ståande framfor HERRENS andlet.

²³Abraham gjekk nærare og sa: «Vil du verkeleg riva bort dei rettferdige saman med dei urettferdige?

²⁴Kva om det finst femti rettferdige i byen? Vil du likevel riva dei bort? Vil du ikkje bera over med staden på grunn av dei femti rettferdige som bur der?

²⁵Det liknar ikkje deg å gjera noko slikt, å la rettferdige døy saman med urettferdige! Skal det gå den rettferdige på same måten som den urettferdige? Det liknar ikkje deg! Skulle ikkje dommaren over heile jorda gjera det som rett er?»

²⁶Då sa HERREN: «Finn eg femti rettferdige i Sodoma, skal eg bera over med heile staden for deira skuld.»

²⁷Til det svara Abraham: «Sjå, eg har våga meg til å tala til Herren, eg som er støv og oske.

²⁸Kva om det manglar fem på dei femti rettferdige? Vil du øydeleggja heile byen på grunn av desse fem?» Han svara: «Dersom eg finn førtifem, skal eg ikkje øydeleggja han.»

²⁹Abraham heldt fram med å tala til han. «Kva om det finst førti der?» sa han. Han svara: «For skuld dei førti skal eg ikkje gjera det.»

³⁰Då sa Abraham: «Herren må ikkje bli harm om eg talar! Kva om det finst tretti der?» Han svara: «Dersom eg finn tretti, skal eg ikkje gjera det.»

³¹Abraham sa: «Sjå, eg har våga meg til å tala til Herren. Kva om det finst tjue der?» Han svara: «For skuld dei tjue skal eg ikkje øydeleggja han.»

³²Då sa Abraham: «Herre, bli ikkje harm om eg talar ein einaste gong til! Kva om det finst ti der?» Han svara: «For skuld dei ti skal eg ikkje øydeleggja han.»

³³Då HERREN var ferdig med å tala til Abraham, gjekk han. Og Abraham gjekk heim att.