Read nynorsk 2011 1. Mosebok 40 Bible Online

1. Mosebok 40 - nynorsk 2011 bible

1. Mosebok 40

¹Ei tid etter hende det at munnskjenken og bakaren til kongen i Egypt fornærma herren sin, kongen i Egypt.

²Farao vart sint på dei to hoffmennene sine, overmunnskjenken og bakarmeisteren.

³Han sette dei i forvaring hos sjefen for livvakta, i fengselet der Josef var fange.

⁴Sjefen for livvakta sette Josef til å sjå etter dei og tena dei. Dei vart sitjande ei tid i forvaring.

⁵Medan munnskjenken og bakaren hos kongen i Egypt sat lenkja i fengselet, hadde dei to i ei og same natta kvar sin draum med ulik tyding.

⁶Då Josef kom inn til dei om morgonen, såg han at dei var nedtrykte.

⁷Han spurde hoffmennene til farao, som sat i forvaring saman med han i huset til herren hans: «Kvifor har de så triste andlet i dag?»

⁸Dei svara: «Vi har begge hatt ein draum, men her er det ingen som kan tyda dei.» Då sa Josef til dei: «Høyrer ikkje tydinga Gud til? Fortel!»

⁹Så fortalde overmunnskjenken draumen sin til Josef. Han sa: «Sjå, i draumen min stod ein vinstokk framfor meg.

¹⁰Det var tre greiner på han. Så snart han tok til å skyta knoppar, spratt blomane, og klasane vart til mogne druer.

¹¹Eg heldt begeret til farao i handa. Eg tok druene, pressa dei ut i begeret og gav det til farao.»

¹²Då sa Josef: «Dette er slik å tyda: Dei tre greinene er tre dagar.

¹³Om tre dagar skal farao opphøgja deg og gje deg stillinga di tilbake. Du skal gje begeret til farao på same måten som før då du var munnskjenken hans.

¹⁴Gjev du ville koma meg i hug når det går deg godt! Gjer vel å nemna meg for farao og få meg ut av dette huset.

¹⁵For eg er stolen frå landet til hebrearane, og her har eg ikkje gjort noko som gjer meg fortent til fangeholet.»

¹⁶Då bakarmeisteren såg at Josef hadde gjeve ei god tyding, sa han til han: «Eg òg var i draumen min. Og sjå, eg hadde tre korger med kveitebrød på hovudet.

¹⁷I den øvste korga var det bakverk av alle slag til farao, men fuglane åt bakverket frå korga på hovudet mitt.»

¹⁸Josef svara: «Dette er tydinga: Dei tre korgene er tre dagar.

¹⁹Om tre dagar skal farao opphøgja deg og hengja deg i eit tre, og fuglane skal eta kjøtet av deg.»

²⁰Tredje dagen — det var fødselsdagen til farao — heldt farao eit festmåltid for alle tenarane sine. Då lyfte han opp overmunnskjenken og bakarmeisteren midt blant tenarane sine.

²¹Overmunnskjenken gav han stillinga tilbake, så han fekk gje farao begeret,

²²men bakarmeisteren hengde han. Det gjekk slik Josef hadde tydd draumane for dei.

²³Men overmunnskjenken hugsa ikkje på Josef; han gløymde han.