Read nynorsk 2011 1. Mosebok 41 Bible Online

1. Mosebok 41 - nynorsk 2011 bible

1. Mosebok 41

¹To år etter hadde farao ein draum: Sjå, han stod ved Nilen.

²Opp frå elva steig sju kyr, fine og feite, og gav seg til å beita i sivet.

³Etter dei steig sju andre kyr opp frå elva, stygge og magre, og stilte seg saman med kyrne på elvebredda.

⁴Dei stygge og magre kyrne åt opp dei sju fine og feite. Då vakna farao.

⁵Så sovna han att og drøymde for andre gong: Sjå, sju kornaks, tjukke og gode, voks på eitt og same strået.

⁶Etter dei skaut det opp sju andre kornaks, tynne og svidde av austavinden.

⁷Dei tynne aksa slukte dei sju tjukke og fulle aksa. Då vakna farao og skjøna at det var ein draum.

⁸[166] Men om morgonen var han uroleg til sinns. Han sende bod etter alle spåmennene og vismennene i Egypt. Farao fortalde dei draumane sine, men det var ingen som kunne tyda dei for han.

⁹Då sa overmunnskjenken til farao: «I dag kom eg til å tenkja på syndene mine.

¹⁰Ein gong vart farao sint på tenarane sine og sette meg og bakarmeisteren i forvaring hos sjefen for livvakta.

¹¹I ei og same natt hadde vi kvar vår draum, eg og han, med kvar si tyding.

¹²Det var ein ung hebrear saman med oss der, ein slave hos sjefen for livvakta. Vi fortalde han draumane våre, og han gav draumane kvar si tyding.

¹³Og slik han tydde dei for oss, slik gjekk det. Farao gav meg stillinga tilbake, men bakarmeisteren hengde han.»

¹⁴Då sende farao bod etter Josef, og dei skunda seg og henta han ut frå fangeholet. Han barberte seg og skifte klede og gjekk så inn til farao.

¹⁵Farao sa til Josef: «Eg har hatt ein draum, og det er ingen her som kan tyda han. Men eg har høyrt om deg at når du høyrer ein draum, så kan du tyda han.»

¹⁶Josef svara: «Det er ikkje opp til meg, berre Gud kan gje eit svar som er godt for farao.»

¹⁷Så sa farao til Josef: «Sjå, i draumen stod eg ved elvebredda.

¹⁸Frå elva kom det opp sju kyr, feite og fine, og gav seg til å beita i sivet.

¹⁹Etter dei kom det opp sju andre kyr, tynne, magre og stygge. Så stygge kyr har eg aldri sett i heile Egypt.

²⁰Og dei magre, stygge kyrne åt opp dei første sju, dei feite kyrne.

²¹Men då dei hadde sett dei til livs, kunne det ikkje merkast på dei; dei var like stygge som før. Då vakna eg.

²²I draumen såg eg òg sju kornaks som voks på eitt strå, fulle og gode.

²³Etter dei skaut det opp sju andre aks, tørre, tynne og svidde av austavinden.

²⁴Dei tynne aksa slukte dei sju gode. Dette fortalde eg til spåmennene, men ingen kunne forklara det for meg.»

²⁵Då sa Josef til farao: «Farao har hatt ein og same draumen. Gud har late farao få vita kva han vil gjera.

²⁶Dei sju gode kyrne er sju år, og dei sju gode aksa er sju år. Det er ein og same draumen.

²⁷Dei sju magre og stygge kyrne som kjem opp etter dei, er sju år. Og dei sju kornaksa, tynne og svidde av austavinden, er sju år med hungersnaud.

²⁸Det var det eg meinte då eg sa til farao: Gud har vist farao kva han vil gjera.

²⁹Sjå, det skal koma sju år med overflod i heile Egypt.

³⁰Etter dei skal det koma sju år med hungersnaud, så all overfloda skal bli gløymd i Egypt. Svolten skal gjera ende på landet.

³¹Ingen skal minnast overfloda i landet, for svolten som følgjer, skal bli hard.

³²Når farao hadde same draumen to gonger, kjem det av at Gud har fastsett dette. Han vil skunda seg å gjera det.

³³No må farao sjå seg ut ein vis og vitug mann og setja han over Egypt.

³⁴Farao må gripa inn. Han må peika ut tilsynsmenn utover landet og krevja inn ein femtedel av avlingane frå Egypt i dei sju åra det er overflod.

³⁵Dei skal samla all maten frå dei gode åra som kjem, og lagra treskt korn i byane under vakthald frå farao.

³⁶Maten skal vera forråd for landet i dei sju åra med hungersnaud som kjem over Egypt. Då skal ikkje landet gå til grunne av svolt.»

³⁷Farao og alle tenarane hans syntest godt om dette rådet.

³⁸Og farao sa til tenarane sine: «Finst det nokon mann som denne, ein som har Guds ande i seg?»

³⁹Så sa farao til Josef: «Sidan Gud har late deg få vita alt dette, finst det ingen så vis og vitug som du.

⁴⁰Du skal styra mitt hus, og heile folket mitt skal retta seg etter det du seier. Berre når det gjeld trona, skal eg vera større enn deg.»

⁴¹Og farao sa til Josef: «Sjå, eg set deg over heile Egypt.»

⁴²[167] Så tok han signetringen av handa si og sette han på handa til Josef. Han kledde han i linklede og hengde ei gullkjede om halsen på han.

⁴³[168] Han lét Josef køyra i den nest beste vogna si, og dei ropa framfor han: «Bøy kne!» Slik sette farao han over heile Egypt.

⁴⁴Og han sa til Josef: «Eg er farao, men utan løyve frå deg skal ingen lyfta hand eller fot i heile Egypt.»

⁴⁵[169] Farao kalla Josef Safenat-Paneah og gav han Asenat til kone. Ho var dotter til Potifera, presten i On. Sidan drog Josef omkring i Egypt.

⁴⁶Josef var tretti år gammal då han steig fram for farao, kongen i Egypt. Så drog Josef bort frå farao og reiste over heile Egypt.

⁴⁷Jorda bar så det bogna dei sju åra det var overflod.

⁴⁸Han samla allslags grøde i dei sju åra landet fekk, og han lagra henne i byane. I kvar by lagra han grøda frå markene omkring.

⁴⁹Slik samla Josef treskt korn i mengder så store som havsens sand, heilt til han gav opp å rekna, for det lét seg ikkje rekna.

⁵⁰Før det første året med hungersnaud kom, fekk Josef to søner med Asenat, dotter til Potifera, presten i On.

⁵¹[170] Den førstefødde kalla han Manasse. «For Gud har late meg gløyma alt mitt strev og heile farshuset mitt.»

⁵²[171] Den andre kalla han Efraim. «For Gud har gjort meg fruktbar i landet der eg vart plaga.»

⁵³Dei sju gode åra i Egypt tok slutt.

⁵⁴Så byrja dei sju åra med hungersnaud, slik Josef hadde sagt. Det vart hungersnaud i alle land, men i heile Egypt fanst det mat.

⁵⁵Då heile Egypt leid av svolt, ropa folk til farao etter brød. Han sa til dei: «Gå til Josef og gjer det han seier dykk!»

⁵⁶Det vart hungersnaud over heile jorda. Då opna Josef alle lagera og selde korn til egyptarane, for hungersnauda var hard i Egypt.

⁵⁷Og heile verda kom til Egypt for å kjøpa korn frå Josef, for hungersnauda var hard over heile jorda.