Read nynorsk 2011 1. Mosebok 46 Bible Online

1. Mosebok 46 - nynorsk 2011 bible

1. Mosebok 46

¹Så braut Israel opp med alt det han hadde. Då han kom til Beer-Sjeba, ofra han slaktoffer til han som var Gud til Isak, far hans.

²Gud tala til Israel i eit syn om natta og sa: «Jakob, Jakob!» Og han svara: «Her er eg.»

³Så sa han: «Eg er Gud, Gud til far din. Ver ikkje redd for å dra ned til Egypt, for eg vil gjera deg til eit stort folk der.

⁴Eg går med deg ned til Egypt, men eg skal føra deg opp att òg. Og handa til Josef skal lukka auga dine.»

⁵Så reiste Jakob frå Beer-Sjeba. Israels-sønene lyfte Jakob, far sin, kvinnene og borna opp i vognene som farao hadde sendt for å henta han.

⁶Dei tok med seg buskapen og alle eigedelane dei hadde samla seg i Kanaan. Så kom Jakob og heile ætta hans med han til Egypt.

⁷Han hadde med seg heile ætta si til Egypt, sønene og sonesønene, døtrene og sonedøtrene.

⁸Dette er namna på israelittane som kom til Egypt, Jakob og etterkomarane hans: Ruben, den førstefødde sonen til Jakob

⁹og sønene hans: Henok, Pallu, Hesron og Karmi;

¹⁰sønene til Simon: Jemuel, Jamin, Ohad, Jakin og Sohar, og Saul, son til ei kvinne frå Kanaan;

¹¹sønene til Levi: Gersjon, Kehat og Merari;

¹²sønene til Juda: Er, Onan, Sjela, Peres og Serah — Er og Onan døydde i Kanaan; Peres hadde sønene Hesron og Hamul;

¹³sønene til Jissakar: Tola, Puvva, Job og Sjimron;

¹⁴sønene til Sebulon: Sered, Elon og Jahleel.

¹⁵Dette var sønene til Lea, som ho fødde Jakob i Paddan-Aram. I tillegg fekk ho dottera Dina. I alt var det trettitre søner og døtrer.

¹⁶Sønene til Gad: Sifjon, Haggi, Sjuni, Esbon, Eri, Arodi og Areli;

¹⁷sønene til Asjer: Jimna, Jisjva, Jisjvi og Beria, dessutan Serah, syster deira. Beria hadde sønene Heber og Malkiel.

¹⁸Dette var borna til Silpa, som Laban gav Lea, dotter si. Desse fødde ho Jakob, seksten i talet.

¹⁹Sønene til Rakel, kona til Jakob, var Josef og Benjamin.

²⁰Josef fekk born i Egypt. Asenat, dotter til presten i On, Potifera, fødde han Manasse og Efraim.

²¹Sønene til Benjamin: Bela, Beker, Asjbel, Gera, Naaman, Ehi, Rosj, Muppim, Huppim og Ard.

²²Dette var sønene til Rakel, som ho fødde Jakob, fjorten i talet.

²³Son til Dan: Husjim;

²⁴sønene til Naftali: Jahseel, Guni, Jeser og Sjillem.

²⁵Dette var sønene til Bilha, som Laban gav Rakel, dotter si. Desse fødde ho Jakob, sju i talet.

²⁶Dei som kom med Jakob til Egypt, og som stamma frå han, var sekstiseks i talet, forutan sonekonene hans.

²⁷Josef hadde to søner som vart fødde i Egypt. Dei som kom med Jakobs hus til Egypt, var sytti i talet.

²⁸Jakob sende Juda føre seg til Josef for at han skulle visa veg til Gosen. Og dei kom til landet Gosen.

²⁹Josef spente for vogna og drog opp for å møta Israel, far sin, i Gosen. Då han fekk sjå han, kasta han seg om halsen på han og gret lenge på skuldra hans.

³⁰Så sa Israel til Josef: «No kan eg døy, for no har eg sett andletet ditt og veit at du enno lever!»

³¹Josef sa til brørne sine og dei andre i familien: Eg vil dra opp og fortelja dette til farao. Eg vil seia at brørne mine og familien min, som var i Kanaan, har kome til meg.

³²Mennene er gjetarar og lever av buskapen sin. Småfeet og storfeet og alt dei eig, har dei teke med seg.

³³Når så farao kallar på dykk og spør: «Kva har de til leveveg?»

³⁴skal de svara: «Tenarane dine har levd av buskapen frå ungdomen av og til no, vi som fedrane våre.» Då får de bu i Gosen, for gjetarar er noko avskyeleg for egyptarane.