Read nynorsk 2011 1. Mosebok 50 Bible Online

1. Mosebok 50 - nynorsk 2011 bible

1. Mosebok 50

¹Då kasta Josef seg gråtande ned over far sin og kyste han.

²Og Josef baud at legane han hadde i si teneste, skulle balsamera faren; og legane balsamerte Israel.

³Det tok førti dagar, for så lang tid tek ei balsamering. Og egyptarane gret over han i sytti dagar.

⁴Då sørgjetida var over, sa Josef til dei som tente ved hoffet til farao: «Om de har velvilje for meg, så sei til farao:

⁵Far min tok meg i eid og sa: Når eg no døyr, må du leggja meg i den grava eg kjøpte meg i Kanaan. Lat meg difor få dra opp og gravleggja far min og så koma tilbake!»

⁶Farao sa: «Dra berre opp og gravlegg far din, slik han lét deg sverja.»

⁷Så drog Josef opp for å gravleggja far sin. Alle tenarane til farao, dei eldste i faraos hus og dei eldste i landet drog opp saman med Josef.

⁸Heile Josefs hus, brørne og farshuset hans var òg med. Berre dei små borna, småfeet og storfeet lét dei vera att i Gosen.

⁹Han hadde òg med seg vogner og ryttarar, så det vart eit stort følgje.

¹⁰[188] Dei kom til Goren-Haatad, som ligg på den andre sida av Jordan, og heldt der ei stor og verdig sørgjehøgtid. Josef sørgde over far sin i sju dagar.

¹¹[189] Kanaanearane som budde i landet, såg sørgjehøgtida i Goren-Haatad og sa: «Det er ei verdig sørgjehøgtid egyptarane held.» Difor kalla dei staden Abel-Misrajim. Han ligg på den andre sida av Jordan.

¹²Sønene gjorde med Jakob som han hadde bode dei.

¹³Dei førte han til Kanaan og gravla han i hòla på Makpela-marka, austafor Mamre, det jordstykket Abraham kjøpte av hetitten Efron for å ha til gravstad.

¹⁴Då Josef hadde gravlagt far sin, drog han tilbake til Egypt saman med brørne sine og alle som hadde drege opp med han for å gravleggja Jakob.

¹⁵Då brørne til Josef såg at far deira var død, sa dei: «Berre no ikkje Josef legg oss for hat og gjev oss att for alt det vonde vi har gjort mot han!»

¹⁶Så sende dei bod til Josef og sa: «Før han døydde, baud far din

¹⁷at vi skulle seia dette til deg: Kjære, tilgjev brørne dine den uretten dei gjorde då dei synda og handla vondt mot deg. Tilgjev no uretten som er gjord av oss som tener din fars Gud.» Josef gret då dei tala slik til han.

¹⁸Sidan kom brørne sjølve og kasta seg ned for han og sa: «Sjå, vi er dine tenarar.»

¹⁹Då sa Josef til dei: «Ver ikkje redde! Er eg i Guds stad?

²⁰De tenkte å gjera meg vondt, men Gud tenkte det til det gode, for han ville gje liv til eit stort folk, slik vi ser i dag.

²¹Så ver ikkje redde! Eg skal syta for dykk og borna dykkar.» Slik trøysta han dei og tala til hjartet deira.

²²Josef vart buande i Egypt, både han og farshuset hans. Han vart 110 år gammal.

²³[190] Josef fekk sjå borna til Efraim i tredje ledd. Og borna til Makir, son til Manasse, vart fødde på knea til Josef.

²⁴Josef sa til brørne sine: «No skal eg døy. Men Gud skal sjå til dykk og føra dykk opp frå dette landet til det landet han lova Abraham, Isak og Jakob.»

²⁵Og Josef tok Israels-sønene i eid og sa: «Når Gud ser til dykk, då skal de føra knoklane mine med herifrå.»

²⁶Så døydde Josef, 110 år gammal. Dei balsamerte han, og han vart lagd i ei kiste i Egypt.