Read nynorsk 2011 1. Mosebok 7 Bible Online

1. Mosebok 7 - nynorsk 2011 bible

1. Mosebok 7

¹HERREN sa til Noah: «Gå inn i arka, du og heile huslyden din! For du er den einaste eg i denne tid har sett som er rettferdig for meg.

²Av alle reine dyr skal du ta med deg sju par, hann og ho saman, og av alle dyr som ikkje er reine, eitt par, hann og ho saman,

³og like eins av fuglane under himmelen, sju par, hann og ho, for å halda kvar art på heile jorda i live.

⁴For om sju dagar vil eg la det regna på jorda i førti dagar og førti netter og utrydda frå jorda alt som finst, alt eg har laga.»

⁵Og Noah gjorde alt som HERREN hadde pålagt han.

⁶Noah var 600 år då storflaumen kom over jorda.

⁷Så gjekk Noah inn i arka saman med sønene sine, kona og svigerdøtrene, for å koma unna vatnet frå storflaumen.

⁸Av dei reine dyra og av dei som ikkje var reine, av fuglane og av alt som kryp på marka,

⁹kom to og to inn til Noah i arka, hann og ho, slik Gud hadde pålagt Noah.

¹⁰Og etter sju dagar hende det. Då kom vatnet frå storflaumen over jorda.

¹¹I det året då Noah fylte 600 år, den syttande dagen i den andre månaden, braut alle kjelder i det store djupet fram, og himmelslusene opna seg.

¹²Og det regna over jorda i førti dagar og førti netter.

¹³Nett på denne dagen gjekk Noah og sønene Sem, Ham og Jafet inn i arka saman med kona til Noah og dei tre svigerdøtrene hans,

¹⁴både dei og alle slag ville dyr, alt slag fe, alle slag kryp som det kryr av på jorda, og alle slag fuglar, alt som har venger til å flyga med.

¹⁵Dei kom inn til Noah i arka, to og to av alt som er av kjøt og blod, alt som har livsande i seg.

¹⁶Dei som kom, hann og ho av alt som er av kjøt og blod, gjekk inn slik Gud hadde pålagt Noah. Og HERREN lèt att etter han.

¹⁷Då kom storflaumen over jorda i førti dagar. Vatnet steig og lyfte arka, så ho flaut opp frå jorda.

¹⁸Vatnet fløymde og steig høgt over jorda, og arka dreiv omkring på vatnet.

¹⁹Veldig og mektig fløymde vatnet over jorda og gøymde alle høge fjell under himmelen.

²⁰[31] Femten alner steig vatnet over fjella, og fjella vart gøymde.

²¹Då omkom alt liv som det krydde av på jorda, både fugl og fe og ville dyr og alt myldrande kryp på jorda, og alle menneska.

²²Alt som hadde livspust i nasen, alt som levde på landjorda, døydde.

²³Han utsletta alt som fanst på jorda, frå folk til fe, kryp og fuglar under himmelen, alt vart utsletta frå jorda. Berre Noah og dei som var med han i arka, vart att.

²⁴Og vatnet fløymde over jorda i 150 dagar.