Read nynorsk 2011 2. Samuelsbok 1 Bible Online

2. Samuelsbok 1 - nynorsk 2011 bible

2. Samuelsbok 1

¹Då Saul var død og David var komen att etter sigeren over amalekittane, heldt han til i Siklag i to dagar.

²[1] Den tredje dagen kom det ein mann frå Sauls leir med sundrivne klede og med jord på hovudet. Då han kom fram til David, kasta han seg til jorda og hylla han.

³David spurde han: «Kvar kjem du frå?» Han svara: «Frå Israelsleiren, eg slapp unna.»

⁴Då sa David til han: «Fortel meg kva som har hendt!» Han svara: «Folket flykta frå slaget, og mange av dei fall og mista livet. Saul og Jonatan, son hans, er òg døde.»

⁵David spurde ungguten som fortalde dette: «Korleis veit du at Saul og Jonatan, son hans, er døde?»

⁶Guten som melde frå, svara: «Det laga seg så at eg var på Gilboa-fjellet. Der stod Saul og støtta seg på spydet sitt medan stridsvognene og ryttarane trengde hardt inn på han.

⁷Han snudde seg og fekk auge på meg. Då ropa han på meg, og eg svara: Ja, her er eg.

⁸Så spurde han: Kven er du? Eg svara: Eg er amalekitt.

⁹Då sa han til meg: Still deg over meg og gjev meg dødsstøyten! For eg er i dødskrampe, men enno i live.

¹⁰Så gjekk eg bort til han og gav han dødsstøyten, for eg skjøna at han ikkje hadde kunna overleva om han hadde falle. Eg tok krona han hadde på hovudet, og ringen han hadde rundt armen, eg kjem med dei hit til min herre.»

¹¹Då tok David tak i kleda sine og reiv dei sund. Det same gjorde alle mennene som var med han.

¹²Heilt til kvelden heldt dei sørgjehøgtid og fasta og gret over Saul og Jonatan, son hans, over HERRENS folk og Israels hus fordi dei var falne for sverd.

¹³Så spurde David ungguten som hadde fortalt han dette: «Kvar er du frå?» Han svara: «Eg er son til ein innflyttar, ein amalekitt.»

¹⁴Då sa David til han: «Korleis kunne du våga å leggja hand på HERRENS salva og drepa han?»

¹⁵David ropa på ein av sine unge menn og sa: «Kom hit og hogg han ned!» Mannen slo han i hel,

¹⁶og David sa: «Ditt blod kjem over ditt eige hovud. For din eigen munn vitna mot deg då du sa: Eg har drepe HERRENS salva.»

¹⁷David stemde i denne likklaga over Saul og Jonatan, son hans,

¹⁸[2] og han baud at Juda-folket skulle læra denne klaga. Ho blir kalla «Bogen» og er oppskriven i «Boka til den rettvise»:

¹⁹Din prydnad, Israel, ligg drepen på haugane dine. Falne er krigarane!

²⁰Kunngjer ikkje dette i Gat, meld ikkje dette på gatene i Asjkalon! Filistardøtrene ville gleda seg, døtrene til dei uomskorne jubla.

²¹ [3] De Gilboa-fjell, gjev det aldri må falla dogg eller regn på dykk, gjev markene aldri må bera førstegrøde! For der låg tilsølte krigarskjold, Sauls skjold var ikkje smurt med olje.

²²Utan blod av falne, utan feitt av krigarar vende aldri Jonatans boge attende eller Sauls-sverdet umetta heim.

²³Saul og Jonatan, elska og avhaldne i live, døden skilde dei ikkje åt. Raskare var dei enn ørnar, sterkare var dei enn løver.

²⁴Israels døtrer, gråt over Saul, som kledde dykk fagert i purpur og prydde dykkar klede med gull!

²⁵Falne er krigarane, falne i kamp! Jonatan ligg drepen på haugane dine.

²⁶ Eg sørgjer over deg, Jonatan, min bror! Inderleg var du meg kjær. Din kjærleik var meg meir underfull enn kvinners kjærleik.

²⁷Falne er krigarane, krigsvåpna øydelagde!