Read nynorsk 2011 2. Samuelsbok 22 Bible Online

2. Samuelsbok 22 - nynorsk 2011 bible

2. Samuelsbok 22

¹Då HERREN hadde berga David frå alle fiendane hans og frå Saul, bar David fram denne songen for HERREN.

²Han sa: HERREN er mitt berg og mi borg og min utfriar,

³min Gud er fjellet der eg søkjer livd. Han er mitt skjold og mi frelse, min styrke og mitt vern, mi tilflukt, min frelsar som friar meg frå vald.

⁴Eg ropa til HERREN, han som får lovsong, og eg vart frelst frå mine fiendar.

⁵Dødens brotsjøar braut ikring meg, malstraumane skremde meg.

⁶Dødsrikets band vart spente om meg, dødens snarer venta meg.

⁷I mi naud kalla eg på HERREN, eg ropa til min Gud. Han høyrde meg frå sitt tempel, mitt rop nådde hans øyre.

⁸Då skalv og skaka jorda, himmelens grunnvollar riste, dei skalv fordi han var harm.

⁹Røyk steig opp or hans nase, øydande eld or hans munn, gneistar loga opp frå han.

¹⁰Han bøygde himmelen og steig ned, under føtene hans var mørke skyer.

¹¹Han reid på kjeruben, han flaug og kom til syne på vindens venger.

¹²Han gjorde mørkret til sitt telt, hadde svarte, regntunge skyer kring seg.

¹³Gneistar og glør loga opp frå stråleglansen framfor han.

¹⁴ HERREN torna frå himmelen, Den høgste lét røysta lyda.

¹⁵ [64] Han skaut sine piler og spreidde dei, han skremde dei med lyn.

¹⁶Rennene på havbotnen kom til syne, grunnvollane under jorda viste seg då HERREN truga, då han fnyste av vreide.

¹⁷Han rette ut handa frå det høge og greip meg, drog meg opp or veldige vatn.

¹⁸Han berga meg frå min mektige fiende då dei som hata meg, var for sterke.

¹⁹På ulukkedagen kom dei imot meg, men HERREN var mi støtte.

²⁰Han førte meg ut i ope land og fria meg ut, for han har glede i meg.

²¹ HERREN gav meg att for mi rettferd, han lønte meg, for mine hender var reine.

²²Eg hadde halde meg til HERRENS vegar og ikkje gjort meg skuldig i urett mot min Gud.

²³Alle hans lover hadde eg for auge, eg veik ikkje av frå hans forskrifter.

²⁴For han var eg heil i mi ferd, eg akta meg vel for å synda.

²⁵ HERREN lønte meg for mi rettferd då han såg at eg var rein.

²⁶Du er trufast mot den som er tru, heilhjarta mot kvar heilhjarta krigar.

²⁷Du viser deg rein mot den som er rein, men vrang mot den som fer med svik.

²⁸Du frelser eit folk i naud, men auga dine er vende mot dei stolte, du audmjukar dei.

²⁹For du er mi lampe, HERRE, HERREN lyser opp mitt mørker.

³⁰Med deg kan eg storma mot ein krigarflokk, med Guds hjelp kan eg springa over murar.

³¹Guds veg er fullkomen, HERRENS ord er reint. Han er eit skjold for alle som søkjer tilflukt hos han.

³²For kven er Gud om ikkje HERREN, kven er eit berg om ikkje vår Gud?

³³Gud er mitt sterke vern, han gjer mi ferd heil.

³⁴Han gjev meg føter som ei hind og lèt meg stå på høgdene.

³⁵Han lærer opp hendene mine til krig, armane spenner bogen av bronse.

³⁶Du gjev meg di frelse til skjold, bøyer deg ned og gjer meg stor.

³⁷Du opnar veg for mine steg, anklane mine vaklar ikkje.

³⁸Eg jagar mine fiendar og slettar dei ut, eg snur ikkje før eg har gjort ende på dei.

³⁹Eg gjer ende på dei og knuser dei så dei ikkje kan reisa seg, men ligg falne under mine føter.

⁴⁰Du kler meg med styrke til krigen og tvingar mine motstandarar i kne.

⁴¹Du slår mine fiendar på flukt, eg utryddar dei som hatar meg.

⁴²Dei ser seg om, men det er ingen frelsar, dei ropar til HERREN, men han svarar dei ikkje.

⁴³Eg knuser dei som støv på jorda, trør og trakkar dei ned som søle i gata.

⁴⁴Du bergar meg frå mitt folk som ligg i strid, held meg oppe som hovding over folkeslag. Folk eg ikkje kjende, må tena meg;

⁴⁵framande kryp for meg, dei lyder berre dei høyrer om meg.

⁴⁶Dei framande visnar, skjelvande kjem dei ut or sine borger.

⁴⁷ HERREN lever! Velsigna er mitt berg! Opphøgd er Gud, min frelsar og mitt berg.

⁴⁸Gud lèt meg få hemn, han legg folkeslag under meg.

⁴⁹Han friar meg frå mine fiendar. Du lyfter meg over motstandarar og bergar meg frå valdsmenn.

⁵⁰Difor vil eg prisa deg mellom folka, HERRE, og lovsyngja ditt namn.

⁵¹Han gjev sin konge store sigrar, han viser miskunn mot den han har salva, mot David og hans ætt til evig tid.