Read nynorsk 2011 2. Samuelsbok 5 Bible Online

2. Samuelsbok 5 - nynorsk 2011 bible

2. Samuelsbok 5

¹Alle Israels stammar kom til David i Hebron og sa: «Sjå, vi er av same bein og kjøt som du.

²Alt for lenge sidan, då Saul var konge over oss, var det du som førte Israel både ut og heim att. HERREN har sagt til deg: Du skal vera hyrding for Israel, folket mitt, du skal vera fyrste over Israel.»

³Då kom alle dei eldste i Israel til kongen i Hebron. Kong David gjorde ei pakt med dei i Hebron for HERRENS andlet. Og dei salva David til konge over Israel.

⁴David var tretti år gammal då han vart konge, og han styrte i førti år.

⁵I Hebron var han konge over Juda i sju år og seks månader, og i Jerusalem var han konge over heile Israel og Juda i trettitre år.

⁶Kongen og mennene hans drog no til Jerusalem, mot jebusittane som budde der i landet. Men dei sa til David: «Her kjem du aldri inn! Halte og blinde skal driva deg bort og seia: Her kjem David aldri inn!»

⁷David tok likevel Sion-borga, som no er Davidsbyen.

⁸[14] Den dagen sa David: «Kvar den som drep ein jebusitt, desse halte og blinde som hatar David, skal koma fram til vass-sjakta.» Difor heiter det: «Ein blind eller halt får ikkje koma inn i tempelet.»

⁹[15] David slo seg ned i borga og kalla henne Davidsbyen. Han bygde omkring henne, frå Millo og innover.

¹⁰David fekk stadig større makt, for HERREN, allhærs Gud, var med han.

¹¹Hiram, kongen i Tyros, sende utsendingar til David. Dei kom med sedertre og hadde med seg tømrarar og steinhoggarar. Dei bygde eit slott for David.

¹²Då skjøna David at HERREN hadde stadfest kongedømet hans over Israel og lyft kongsveldet hans høgt for sitt folk Israels skuld.

¹³Etter at David hadde flytt frå Hebron, tok han seg fleire følgjekoner og koner frå Jerusalem, og han fekk endå fleire søner og døtrer.

¹⁴Dette er namna på dei sønene han fekk i Jerusalem: Sjammua, Sjobab, Natan, Salomo,

¹⁵Jibhar, Elisjua, Nefeg, Jafia,

¹⁶Elisjama, Eljada og Elifelet.

¹⁷Då filistrane fekk høyra at David var salva til konge over Israel, drog dei alle ut og ville få tak i han. Men David fekk greie på det og drog ned til borga.

¹⁸[16] Filistrane kom og spreidde seg ut over Refa'im-dalen.

¹⁹Då spurde David HERREN til råds: «Skal eg dra ut mot filistrane? Vil du gje dei i mine hender?» Og HERREN svara David: «Dra opp! Eg vil gje filistrane i dine hender.»

²⁰[17] Så drog David til Baal-Perasim, og der slo han dei. Då sa han: «HERREN har brote igjennom fiendens rekkjer føre meg, slik vatn bryt seg veg.» Difor kallar dei denne staden Baal-Perasim.

²¹Der lét filistrane etter seg gudebileta sine, og David og mennene hans tok dei med seg.

²²Men filistrane drog igjen opp og spreidde seg ut over Refa'im-dalen.

²³[18] Då spurde David HERREN til råds, og han svara: «Du skal ikkje dra beint opp mot dei. Gå rundt og bak dei, så kjem du på dei midt framfor baka-trea.

²⁴Når du høyrer lyden av marsjgang over tretoppane, så gjer deg klar! For då dreg HERREN ut framfor deg for å slå filistarhæren.»

²⁵David gjorde som HERREN hadde sagt han. Han slo filistrane og forfølgde dei frå Geba og nesten til Geser.