Read nynorsk 2011 2. Samuelsbok 8 Bible Online

2. Samuelsbok 8 - nynorsk 2011 bible

2. Samuelsbok 8

¹[23] Ei tid etter dette slo David filistrane og tvinga dei under seg. Han tok Meteg-Amma frå dei.

²David vann over moabittane òg. Han baud dei leggja seg ned på jorda, og så målte han dei med ei snor. Han målte ut to snorlengder med folk som skulle drepast, og ei full snorlengd med folk som skulle få leva. Moabittane vart Davids slavar og laut betala skatt.

³[24] Like eins vann David over Hadadeser, son til Rehob, kongen av Soba, då han drog ut for å vinna att herredømet over landet ved Eufrat.

⁴David tok frå han 1700 ryttarar og 20 000 fotfolk. Han skar over hasane på alle vognhestane, men 100 hestar sparte han.

⁵Aramearane i Damaskus kom og ville hjelpa Hadadeser, kongen av Soba. Men David felte 22 000 av dei.

⁶David sette ut vaktpostar i Aram-Damaskus. Dei vart slavar for David og laut betala skatt til han. Slik hjelpte HERREN David kvar helst han fór fram.

⁷[25] David tok gullskjolda som mennene til Hadadeser hadde bore, og førte dei til Jerusalem.

⁸Frå Betah og Berotai, to byar som høyrde Hadadeser til, tok kong David bronse i store mengder.

⁹[26] Då To'i, kongen i Hamat, høyrde at David hadde vunne over heile hæren til Hadadeser,

¹⁰sende han Joram, son sin, til kong David. Han skulle helsa han og ønskja han til lukke med sigeren over Hadadeser. For Hadadeser hadde støtt ført krig med To'i. Joram hadde med seg gåver av sølv, gull og bronse.

¹¹Alt dette helga kong David til HERREN saman med det sølvet og gullet han hadde teke frå alle dei andre folkeslaga han hadde lagt under seg,

¹²[27] frå edomittane, moabittane, ammonittane, filistrane og amalekittane. Det same gjorde han med hærfanget frå Hadadeser, son til Rehob, kongen i Soba.

¹³[28] David vann seg eit stort namn då han kom tilbake frå sigeren over edomittane i Saltdalen. 18 000 mann vart slegne.

¹⁴Han sette ut vaktpostar i Edom. I heile Edom sette han ut vaktpostar. Alle edomittane vart slavar for David. Slik hjelpte HERREN David kvar helst han fór fram.

¹⁵David rådde no over heile Israel. Han fremja rett og rettferd for heile folket sitt.

¹⁶Joab, son til Seruja, var hærførar, og Josjafat, son til Ahilud, var kanslar.

¹⁷Sadok, son til Ahitub, og Ahimelek, son til Abjatar, var prestar og Seraja riksskrivar.

¹⁸[29] Benaja, son til Jojada, var leiar for kretarane og pletarane, og sønene til David var prestar.