Read nynorsk 2011 1. Kongebok 2 Bible Online

1. Kongebok 2 - nynorsk 2011 bible

1. Kongebok 2

¹Då det leid mot slutten for David, sa han til Salomo, son sin:

²Eg skal snart gå den vegen som alt her på jorda må gå. Ver du sterk og ver ein mann!

³Hald bodet til HERREN din Gud! Gå på hans vegar og hald deg til hans forskrifter, bod, lover og påbod, slik det er skrive i Moselova. Då skal du gå visleg fram i alt du gjer, og kvar så du vender deg.

⁴For HERREN vil halda det ordet han gav då han sa om meg: «Dersom sønene dine aktar på si ferd og vandrar for mitt andlet i truskap, av heile sitt hjarte og heile si sjel, skal det aldri mangla ein mann av di ætt på Israels kongsstol.»

⁵Du veit jo sjølv kva Joab, son til Seruja, gjorde mot meg og mot dei to hærførarane i Israel, Abner, son til Ner, og Amasa, son til Jeter: Han drap dei og lét blod renna i fredstid. Slik fekk han krigsblod på beltet han hadde om livet, og på skorne han hadde på føtene.

⁶Bruk no det gode vitet ditt. Lat ikkje den gamle og gråhåra mannen fara i fred til dødsriket.

⁷Men mot sønene til Barsillai frå Gilead skal du gjera godt. Lat dei vera mellom dei som et ved bordet ditt. For dei tok venleg imot meg då eg flykta frå Absalom, bror din.

⁸Du har òg hos deg Sjimi, son til Gera frå Bahurim, av Benjamin-stammen. Det var han som forbanna meg så stygt den dagen eg var på veg til Mahanajim. Men seinare kom han og møtte meg nede ved Jordan. Då svor eg ved HERREN at eg ikkje skulle la han døy for sverd.

⁹Men du må ikkje la han sleppa straff. Du er ein klok mann og veit nok kva du skal gjera med han. Lat han gå ned til dødsriket med blod i det gråe håret sitt.

¹⁰Så gjekk David til kvile hos fedrane sine og vart gravlagd i Davidsbyen.

¹¹I førti år hadde David vore konge over Israel. Sju år styrte han i Hebron og trettitre år i Jerusalem.

¹²Salomo sette seg på kongsstolen etter David, far sin, og kongedømet hans var trygt grunnfest.

¹³Adonja, son til Haggit, kom til Batseba, mor til Salomo. «Kjem du i fredeleg ærend?» spurde ho. «Ja», svara han,

¹⁴«men det er ei sak eg gjerne vil snakka med deg om.» «Sei det», sa ho.

¹⁵Då sa han: «Du veit at kongedømet med rette var mitt, og heile Israel venta at eg skulle bli konge. Men så gjekk kongedømet over frå meg til bror min. Han fekk det av HERREN sjølv.

¹⁶No er det berre éin ting eg vil be deg om, og du må ikkje visa meg bort.» «Sei det!» svara Batseba.

¹⁷Då sa han: «Tal med kong Salomo — for deg viser han ikkje bort — og bed om at han lèt meg få Abisjag frå Sjunem til kone.»

¹⁸Batseba svara: «Ja vel, eg skal snakka med kongen for deg.»

¹⁹Så gjekk Batseba til kong Salomo for å leggja Adonjas sak fram for han. Kongen reiste seg, gjekk imot henne og bøygde seg djupt for henne. Så sette han seg på kongsstolen. Ein stol vart sett fram for mor til kongen; ho sette seg ved høgre sida hans.

²⁰Ho sa: «Det er berre ein liten ting eg vil be deg om. Ikkje vis meg bort!» Kongen svara: «Be om det, mor! Eg viser deg ikkje bort.»

²¹Då sa ho: «Lat Adonja, bror din, få Abisjag frå Sjunem til kone!»

²²[6] Men kong Salomo tok til orde og sa til mor si: «Kvifor bed du om Abisjag frå Sjunem for Adonja? Du kan like godt be om kongsmakta for han. Han er då storebror min, og har presten Abjatar og Joab, son til Seruja, på si side.»

²³Og kong Salomo svor ved HERREN og sa: «Gud la det gå meg ille både no og sidan om ikkje dette skal kosta Adonja livet!

²⁴Så sant HERREN lever, han som har sett meg på kongsstolen etter David, far min, og grunnlagt ei kongsætt for meg, slik som han lova — Adonja skal døy, og det i dag!»

²⁵Så sende kong Salomo Benaja, son til Jojada, i veg. Han hogg ned Adonja, og slik døydde han.

²⁶Kongen sa til presten Abjatar: «Far heim til åkrane dine i Anatot! Du fortener døden, men eg vil ikkje drepa deg i dag, for du har bore paktkista til HERREN Gud framfor David, far min. Du har lide alt det han laut lida.»

²⁷[7] Så dreiv Salomo Abjatar bort og lét han ikkje få vera prest for HERREN lenger. Såleis vart det oppfylt, det ordet som HERREN hadde tala mot Elis hus i Sjilo.

²⁸Då dette kom Joab for øyra — han hadde støtta Adonja, men ikkje Absalom — rømde han til HERRENS telt og greip om altarhorna.

²⁹Salomo fekk melding om at Joab hadde rømt til HERRENS telt og heldt seg nær altaret. Då sende han Benaja, son til Jojada, i veg og sa: «Gå og hogg han ned!»

³⁰Då Benaja kom til HERRENS telt, sa han til Joab: «Kongen seier at du skal koma ut.» Men han svara: «Nei, her vil eg døy.» Benaja gjekk tilbake til kongen og fortalde kva Joab hadde sagt og svara.

³¹Då sa kongen til han: «Gjer som han seier! Hogg han ned og få han i jorda! Så friar du meg og farshuset mitt frå blodet til dei skuldfrie som Joab lét renna.

³²HERREN vil la blodet koma over hovudet hans! Han hogg ned to menn som var betre og meir rettferdige enn han: Abner, son til Ner, hærføraren i Israel, og Amasa, son til Jeter, hærføraren i Juda. Han drap dei med sverd utan at David, far min, visste om det.

³³Måtte deira blod for alltid koma over Joab og ætta hans. Men David og ætta hans, huset og kongsstolen hans skal HERREN gje fred til alle tider.»

³⁴Så gjekk Benaja, son til Jojada, opp og hogg ned Joab og drap han. Han vart gravlagd på heimstaden sin i ørkenen.

³⁵Kongen sette Benaja, son til Jojada, til hærførar etter Joab. Og han sette Sadok til prest etter Abjatar.

³⁶Så sende kongen bod etter Sjimi og sa til han: «Bygg deg eit hus i Jerusalem! Der skal du bu, og derifrå skal du ikkje fara bort.

³⁷Det skal du vita at den dagen du tek ut og går over Kedron-bekken, er du dømd til å døy. Blodet ditt skal renna over ditt eige hovud.»

³⁸Sjimi svara kongen: «Ja vel, tenaren din skal retta seg etter din vilje, herre konge.» Og Sjimi vart buande lenge i Jerusalem.

³⁹Men då tre år var lidne, rømde to av Sjimis slavar til kongen i Gat, Akisj, son til Maaka. Då Sjimi fekk vita at slavane var i Gat,

⁴⁰gjorde han seg ferdig og sala eselet sitt. Han gav seg i veg til Akisj i Gat for å krevja slavane sine tilbake. Sjimi fór av stad og henta slavane frå Gat.

⁴¹Salomo fekk melding om at Sjimi hadde fare frå Jerusalem til Gat og no var komen tilbake.

⁴²Då sende kongen bod etter Sjimi og sa til han: «Tok eg deg ikkje i eid ved HERREN då eg åtvara deg og sa: Det skal du vita for visst at den dagen du forlèt Jerusalem og går nokon annan stad, er du dømd til å døy. Og du svara: Ja vel, eg har høyrt kva du seier.

⁴³Kvifor har du då ikkje halde din eid til HERREN og det påbodet eg gav deg?

⁴⁴Du kjenner til, ja, du veit i hjartet kor mykje vondt du har gjort mot David, far min. HERREN lèt no vondskapen koma over ditt eige hovud.

⁴⁵Men kong Salomo skal vera velsigna, og kongsstolen til David skal stå trygt for HERRENS andlet til alle tider.»

⁴⁶Så baud kongen Benaja, son til Jojada, gå ut og hogga han ned. Slik døydde Sjimi. Og kongsmakta låg trygt i Salomos hand.