Read nynorsk 2011 1. Kongebok 4 Bible Online

1. Kongebok 4 - nynorsk 2011 bible

1. Kongebok 4

¹Kong Salomo styrte no over heile Israel.

²Dette var dei øvste embetsmennene hans: Asarja, son til Sadok, var prest;

³Elihoref og Ahia, sønene til Sjisja, var riksskrivarar; Josjafat, son til Ahilud, var protokollførar;

⁴Benaja, son til Jojada, var hærførar; Sadok og Abjatar var prestar;

⁵Asarja, son til Natan, var oppsynsmann over futane; Sabud, son til Natan, var ven med kongen;

⁶Ahisjar var borgherre; Adoniram, son til Abda, hadde oppsyn med dei som gjorde pliktarbeid.

⁷Salomo sette tolv futar over heile Israel. Dei skulle syta for matforsyningar til kongen og hoffet hans. Kvar sin månad i året skulle dei syta for det.

⁸Dette er namna deira: Ben-Hur, i fjellandet Efraim;

⁹[8] Ben-Deker, i Makas, Sjaalvim, Bet-Sjemesj, Elon og Bet-Hanan;

¹⁰[9] Ben-Hesed, i Arubbot — han hadde Soko og heile Hefer-landet;

¹¹[10] Ben-Abinadab hadde heile Dor-høglandet — han var gift med Tafat, dotter til Salomo;

¹²Baana, son til Ahilud, hadde Taanak, Megiddo og heile Bet-Sjean, som ligg ved Saretan, nedanfor Jisreel, frå Bet-Sjean til Abel-Mehola og bortom Jokmeam;

¹³Ben-Geber i Ramot i Gilead — han hadde teltbyane til Ja'ir, son til Manasse, i Gilead, og Argob-bygda i Basan, seksti store byar med murar og bronsebommar;

¹⁴Ahinadab, son til Iddo, hadde Mahanajim;

¹⁵Ahimaas hadde Naftali — han òg var gift med ei av døtrene til Salomo, Basmat;

¹⁶Baana, son til Husjai, i Asjer og Alot;

¹⁷Josjafat, son til Paruah, i Jissakar;

¹⁸Sjimi, son til Ela, i Benjamin;

¹⁹Geber, son til Uri, i Gilead, det landet som amorittkongen Sihon og Basan-kongen Og hadde hatt. Dessutan var det ein fut i Juda.

²⁰Folket i Juda og Israel var tallaust som sanden ved havet. Dei åt og drakk og var glade.

²¹Salomo herska over alle kongerika frå Eufrat til filistarlandet og heilt til grensa mot Egypt. Dei betalte skatt og stod under Salomo så lenge han levde.

²²[11] Til matlaging hos Salomo gjekk det kvar dag med tretti kor fint mjøl og seksti kor grovt mjøl,

²³ti gjødde oksar, tjue drifteoksar og hundre sauer og i tillegg hjortar, gasellar, dådyr og gjødde gjæser.

²⁴[12] For han herska over alt land vestafor Eufrat, frå Tifsah til Gaza, over alle kongane vestafor Eufrat, og hadde fred på alle kantar rundt ikring.

²⁵I Juda og Israel, frå Dan til Beer-Sjeba, sat kvar mann trygt under sin vinstokk og sitt fikentre så lenge Salomo levde.

²⁶Salomo hadde førti tusen stallplassar til vognhestane sine og tolv tusen ryttarar.

²⁷Dei tolv futane sytte kvar sin månad for matforsyningar til kong Salomo og alle som gjekk til hans bord. Dei lét det ikkje skorta på noko.

²⁸Dei skulle òg etter tur gje bygg og halm til hestane og trekkdyra der dei heldt seg.

²⁹Gud gav Salomo visdom og svært stor innsikt og ein forstand vidare enn sanden på havsens strand.

³⁰Visdomen til Salomo var større enn visdomen til alle i aust og alle egyptarane.

³¹Han var visare enn noko anna menneske, visare enn Etan av Esrah-ætta og Mahol-sønene Heman, Kalkol og Darda. Namnet hans var kjent mellom alle heidningfolka rundt ikring.

³²Salomo smidde tre tusen ordtak, og songane hans var eitt tusen og fem i talet.

³³Han dikta om trea, frå sederen på Libanon til isopen som veks ut av muren, og han dikta om fe og fuglar, krypdyr og fiskar.

³⁴Og dei kom frå alle folk for å høyra visdomen til Salomo, frå alle kongar på jorda som hadde høyrt om visdomen hans.