Read nynorsk 2011 1. Kongebok 7 Bible Online

1. Kongebok 7 - nynorsk 2011 bible

1. Kongebok 7

¹Salomo bygde på kongeborga si i tretten år før han fekk henne ferdig.

²[17] Han bygde Libanon-skoghuset, hundre alner langt, femti alner breitt og tretti alner høgt. Det hadde fire rader med søyler av sedertre, og oppå søylene var det sederbjelkar.

³Det var eit tak av sedertre over takbjelkane som kvilte mot søylene. I alt var det førtifem, femten i kvar rad.

⁴Huset hadde tre rader glas med karmar. Glasa låg beint imot kvarandre i tre høgder.

⁵Alle dørene og glasa hadde firkanta karmar og vende beint imot kvarandre i tre høgder.

⁶Så bygde han søylehallen, som var femti alner lang og tretti alner brei. Framfor han var det ein forhall med søyler, og framfor den eit skjermtak.

⁷Dessutan bygde han tronhallen, der han sat og dømde, Domshallen. Han kledde han med sedertre frå golv til tak.

⁸Hans eige hus, det som han budde i, låg i den andre garden innanfor forhallen. Det var bygd på same måten. Salomo bygde òg eit hus for dotter til farao, som han hadde teke til kone. Det likna forhallen.

⁹Alle desse bygningane var av kostbare steinar som var hogne etter mål. Dei var skorne til med steinsag både på innsida og utsida, frå grunnmuren til gesimsen og på utsida ut mot den store borggarden.

¹⁰Grunnmuren var av kostbare og store steinar, steinar på ti alner og på åtte alner.

¹¹Over dei var det kostbare steinar som var hogne etter mål, og sedertre.

¹²Rundt den store føregarden var det tre lag med hoggen stein og eitt lag med sederbjelkar. Slik var det òg rundt den indre føregarden til HERRENS hus og rundt forhallen.

¹³Kong Salomo sende bod etter Hiram frå Tyros.

¹⁴Han var son til ei enkje av Naftali-stammen, og far hans var ein koparsmed frå Tyros. Hiram hadde godt skjøn og stor kunnskap, så han kunne gjera allslags arbeid i bronse. Han kom til Salomo og gjorde alt det arbeidet kongen ville ha gjort.

¹⁵[18] Hiram støypte dei to bronsesøylene. Den eine søyla var atten alner høg, og det trongst ei snor på tolv alner for å nå ikring henne. Den andre søyla var like stor.

¹⁶Så laga han to søylehovud til å setja på toppen av søylene. Dei var støypte av bronse, og kvart søylehovud var fem alner høgt.

¹⁷På søylehovuda øvst på søylene var det slyngornament: blomeranker i form av lenkjearbeid, sju for kvart søylehovud.

¹⁸Han laga to rader med granateple kring det eine av ornamenta som skulle dekkja søylehovuda øvst på søylene. Slik gjorde han med det andre søylehovudet òg.

¹⁹Hovuda øvst på søylene i forhallen var forma som liljer og målte fire alner.

²⁰Rundt begge søylehovuda, rett ovanfor utbuktinga på den andre sida av ornamentet, hang to hundre granateple i rekkjer.

²¹[19] Han reiste søylene attmed forhallen til tempelet. Han reiste opp den høgre søyla og kalla henne Jakin. Så reiste han opp den venstre søyla og kalla henne Boas.

²²Øvst på søylene var handverk av liljer. No var arbeidet med søylene fullført.

²³[20] Så laga han havet av støypt metall. Det var sirkelforma og målte ti alner frå kant til kant. Høgda var fem alner, og omkrinsen var tretti alner målt med målesnor.

²⁴Nedanfor kanten var det prydd med graskar heile vegen rundt. Dei omkransa heile havet, ti på kvar alen. Det var to rader med graskarutsmykkingar, støypte i eitt med havet.

²⁵Havet stod på tolv oksar. Tre snudde mot nord, tre mot vest, tre mot sør og tre mot aust, og dei stod alle med bakkroppen innover. Havet kvilte på dei.

²⁶[21] Det var ei handsbreidd tjukt, og kanten var laga som kanten på eit beger, forma som ein lotusblom. Havet romma to tusen bat.

²⁷Så laga han ti vognstativ i bronse. Kvart stativ var fire alner langt, fire alner breitt og tre alner høgt.

²⁸Vognstativa var laga slik: Dei hadde tverrlister, og tverrlistene låg mellom rammelistene.

²⁹På tverrlistene mellom rammelistene var det løver, oksar og kjerubar, og det var det òg på rammelistene. Under løvene og oksane var det kransar av hamra arbeid.

³⁰Kvart vognstativ hadde fire hjul av bronse og akslar av bronse. På dei fire føtene var det berearmar som var støypte på under vassfatet. Bak kvar av dei var det kransar.

³¹Opninga for kvart vognstativ var innanfor kransen og nådde ei alen opp over han. Opninga var rund, hadde form som ein sokkel og var på halvanna alen. Det var utskjeringar på opninga òg. Men tverrlistene var firkanta, ikkje runde.

³²Dei fire hjula var under tverrlistene, og hjulakslane sat på vognstativet. Kvart hjul var halvanna alen høgt.

³³Hjula var laga som vognhjul; akslane, hjulringane, eikene og nava — alt saman var støypt.

³⁴Dei fire berearmane var feste til dei fire hjørna på kvart vognstativ. Berearmane var ein del av stativet.

³⁵Øvst på kvart vognstativ gjekk ein runding som var ei halv alen høg. Handtaka og berearmane sat øvst og var støypte i eitt med stativet.

³⁶På flatsida av handtaka og på tverrlistene skar han ut kjerubar, løver og palmar etter som det var rom til, og kransar rundt ikring.

³⁷Slik laga han dei ti vognstativa. Dei var alle støypte på same vis og hadde same mål og form.

³⁸[22] Så laga han ti bronsefat. Kvart fat tok førti bat og målte fire alner. Det var eitt fat for kvart av dei ti vognstativa.

³⁹Fem av vognstativa sette han på høgre sida av tempelet og fem på venstre sida. Havet sette han på høgre sida av huset, mot søraust.

⁴⁰Hiram laga grytene, eldskuffene og offerskålene. Med dette hadde Hiram fullført alt handverksarbeidet han skulle gjera for kong Salomo til HERRENS hus:

⁴¹to søyler; to skåler på søylehovuda øvst på søylene; to slyngornament til å dekkja dei to skålene;

⁴²dei fire hundre granatepla til dei to slyngornamenta — to rader med granateple til kvart ornament, til å dekkja dei to skålene på søylehovuda øvst på søylene;

⁴³dei ti vognstativa og dei ti fata til kvart av dei;

⁴⁴havet — det var berre eitt — og dei tolv oksane under det;

⁴⁵grytene, eldskuffene og offerskålene. Alt dette utstyret som Hiram laga for kong Salomo til HERRENS hus, var av skinande bronse.

⁴⁶Det var på Jordan-sletta kongen fekk dei støypte, i den faste leirjorda mellom Sukkot og Saretan.

⁴⁷Salomo sette på plass alt utstyret, som var i slike mengder at det ikkje lét seg seia kor mykje bronsen vog.

⁴⁸Salomo fekk òg laga alt det andre som skulle vera i HERRENS hus: gullaltaret og gullbordet som skodebrøda skulle liggja på;

⁴⁹lysestakane, fem til høgre og fem til venstre framfor Det høgheilage, av reint gull, blomeornamenta, lampene og tengene av gull;

⁵⁰bollane, knivane, offerskålene, kannene og glopannene av reint gull. Panelet på dørene til det inste rommet, Det høgheilage, og panelet på dørene til tempelhallen var lagt med gull.

⁵¹Så var det fullført, alt arbeidet som kong Salomo hadde gjort på HERRENS hus. Og han flytte dit det som David, far hans, hadde vigd til Herren, både sølvet og gullet og alt utstyret. Han la det inn i skattkammera i HERRENS hus.