Read nynorsk 2011 1. Kongebok 8 Bible Online

1. Kongebok 8 - nynorsk 2011 bible

1. Kongebok 8

¹Så samla Salomo dei eldste i Israel og alle stammehovdingane, leiarane for familiane, hos seg i Jerusalem. Dei skulle føra HERRENS paktkiste opp frå Davidsbyen, det er Sion.

²Og alle menn i Israel samla seg hos kong Salomo på festen i etanim månad, det er den sjuande månaden i året.

³Då alle dei eldste i Israel var komne, lyfte prestane kista,

⁴og dei førte HERRENS paktkiste opp saman med teltheilagdomen og alt det heilage utstyret som var i teltet. Det var prestane og levittane som bar dei.

⁵Kong Salomo stod framfor kista saman med heile Israels forsamling, som hadde samla seg hos han. Dei ofra småfe og storfe i slik mengd at ingen kunne telja eller rekna dei.

⁶Så bar prestane HERRENS paktkiste inn og sette henne der ho skulle stå, i det inste tempelrommet, i Det høgheilage, under vengene på kjerubane.

⁷For kjerubane breidde vengene ut over staden der kista stod, så dei dekte både kista og berestengene ovanfrå.

⁸Stengene var så lange at ein kunne sjå endane av dei frå Det heilage framfor Det høgheilage, men ikkje utanfrå. Der har dei vore til denne dag.

⁹I kista fanst det ikkje anna enn dei to steintavlene som Moses hadde lagt ned der ved Horeb, den gongen HERREN gjorde pakt med israelittane då dei drog ut frå Egypt.

¹⁰[23] Då prestane gjekk ut av heilagdomen, fylte skya HERRENS hus.

¹¹Prestane kunne ikkje stå og gjera teneste på grunn av skya; for HERRENS herlegdom fylte tempelet.

¹²Då sa Salomo: HERREN har sagt at han vil bu i ei mørk sky.

¹³ Men no har eg bygd deg ein staseleg bustad, ein stad der du kan bu i all tid.

¹⁴Så snudde kongen seg og velsigna heile Israels forsamling medan dei stod.

¹⁵Han sa: Velsigna er HERREN, Israels Gud, som med si hand har fullført det han med sin munn lova David, far min, då han sa:

¹⁶[24] «Frå den dagen eg førte Israel, folket mitt, ut frå Egypt, har eg ikkje valt ut nokon by i alle Israel-stammane for at det skulle byggjast eit hus der til bustad for namnet mitt. Men eg valde David til å råda over Israel, folket mitt.»

¹⁷David, far min, hadde i tankar å byggja eit hus for namnet til HERREN, Israels Gud.

¹⁸Men HERREN sa til David, far min: «Då du hadde i tankar å byggja eit hus for namnet mitt, var tanken god.

¹⁹Likevel, det er ikkje du som skal byggja huset, men son din, som er av ditt eige kjøt og blod. Han skal byggja huset for namnet mitt.»

²⁰No har HERREN halde det ordet han tala. Eg har følgt etter David, far min, og teke sete på Israels kongsstol, slik HERREN har sagt, og eg har bygd huset for namnet til HERREN, Israels Gud.

²¹Der har eg sytt for ein stad for paktkista som inneheld den pakta HERREN gjorde med fedrane våre då han førte dei ut frå Egypt.

²²Så stod Salomo fram for HERRENS altar midt framfor heile Israels forsamling. Han breidde hendene ut mot himmelen

²³og sa: HERRE, Israels Gud! Det finst ingen Gud som du, korkje oppe i himmelen eller her nede på jorda. Du held pakta og gjer godt mot tenarane dine når dei ferdast heilhjarta for ditt andlet.

²⁴Du har halde den lovnaden du gav din tenar David, far min. Med di hand har du oppfylt det du lova med din munn, som det viser seg i dag.

²⁵Så hald då, HERRE, Israels Gud, den lovnaden du gav din tenar David, far min, då du sa: «Det skal aldri mangla ein mann av di ætt til å sitja på Israels kongsstol for mitt andlet, så sant sønene dine aktar på si ferd og vandrar for mitt andlet slik som du har gjort.»

²⁶Lat det no stå fast, HERRE, Israels Gud, det ordet du tala til din tenar David, far min!

²⁷Men bur Gud verkeleg på jorda? Sjå, himmelen og himlars himmel kan ikkje rømma deg, langt mindre dette huset som eg har bygd!

²⁸Vend deg mot bøna til tenaren din og ropet hans om nåde, HERRE, min Gud! Høyr ropet frå tenaren din og den bøna han i dag bed for ditt andlet!

²⁹Hald auga dine opne over dette huset natt og dag. Vak over den staden der du har lova at namnet ditt skal bu. Høyr dei bønene som tenaren din ber fram, vend mot denne staden!

³⁰Ja, høyr den bøna om nåde som tenaren din og Israel, folket ditt, bed, vende mot denne staden! Høyr dei i himmelen der du bur, høyr og tilgjev!

³¹Når ein mann skader nesten sin og det blir kravd at han skal gjera eid, og han så kjem og sver framfor altaret ditt i dette huset,

³²då må du høyra det i himmelen, gripa inn og skifta rett mellom tenarane dine. Døm den urettferdige skuldig og lat framferda hans koma att på han sjølv! Frikjenn den rettferdige og lat han få løn for si rettferd!

³³Når Israel, folket ditt, blir slege av fienden fordi dei har synda mot deg, men så vender om til deg og prisar namnet ditt, bed og ropar til deg om nåde i dette huset,

³⁴då må du høyra det i himmelen og tilgje Israel, folket ditt, synda deira. Før dei tilbake til det landet du gav fedrane deira.

³⁵Når himmelen er stengd så det ikkje kjem regn fordi dei har synda mot deg, men dei så bed til deg, vende mot denne staden, prisar namnet ditt og vender om frå synda si fordi du har audmjuka dei,

³⁶då må du høyra det i himmelen og tilgje tenaren din og Israel, folket ditt, synda deira. For du lærer dei den gode vegen dei skal gå. Send då regn over landet ditt, landet du har gjeve folket ditt som eigedom.

³⁷[25] Når det blir hunger og naud i landet, når det kjem pest, når det kjem kornsot og svartrust, grashopper og larvar, når fienden kringset byane i landet — same kva slag plage og sjukdom det er —

³⁸og så ein eller annan eller heile folket ditt, Israel, ber fram bøner og rop om nåde fordi dei kjenner at det stikk dei i hjartet, og breier ut hendene sine mot dette huset,

³⁹då må du høyra det i himmelen der du tronar. Tilgjev, grip inn og gjev kvar og ein att etter framferda hans, du som kjenner hjartet hans. For du er den einaste som kjenner hjartet i kvart menneske!

⁴⁰Så skal dei frykta deg alle dei dagane dei lever i landet du gav fedrane våre.

⁴¹Det kan òg henda at framande som ikkje høyrer til Israel, folket ditt, kjem frå eit land langt borte for ditt namn skuld.

⁴²For dei får nok høyra om ditt store namn, di sterke hand og din utstrekte arm. Når dei så kjem og bed, vende mot dette huset,

⁴³då må du høyra dei i himmelen der du tronar, og gjera alt det dei ropar til deg om! Slik skal alle folk på jorda læra namnet ditt å kjenna, og dei skal frykta deg liksom ditt eige folk, Israel, og sanna at namnet ditt er nemnt over dette huset som eg har bygd.

⁴⁴Når folket ditt dreg ut i krig mot fienden, kvar du så sender dei, og dei bed til HERREN, vende mot den byen som du har valt deg ut, og mot det huset som eg har bygd for namnet ditt,

⁴⁵då må du i himmelen høyra bønene deira og ropa om nåde og hjelpa dei til deira rett.

⁴⁶Når folket syndar mot deg — for det finst ikkje noko menneske som ikkje syndar — så blir du harm på dei og gjev dei i fiendens hand, som fører dei i fangenskap, til fiendelandet, anten det no er langt borte eller nær.

⁴⁷Men så går dei i seg sjølve i det landet der dei blir haldne i fangenskap, og vender om og bed til deg om nåde der i landet og seier: «Vi har synda, bore oss ille åt og gjort urett.»

⁴⁸Om dei då vender om til deg av heile sitt hjarte og heile sin hug der i fiendeland, hos dei som tok dei til fange, og bed til deg vende mot det landet du gav fedrane deira, mot byen som du har valt ut, og mot huset som eg har bygd for namnet ditt,

⁴⁹då må du i himmelen der du tronar, høyra bønene deira og ropa deira om nåde og hjelpa dei til deira rett.

⁵⁰Tilgjev folket ditt alle brota og syndene dei har gjort mot deg. Lat dei møta miskunn hos dei som held dei i fangenskap, så dei miskunnar seg over dei.

⁵¹For dei er ditt folk og din eigedom, som du førte ut frå Egypt, midt ut av smelteomnen.

⁵²Lat auga dine vera opne for dei bøner og rop om nåde som stig opp frå tenaren din og frå folket ditt, Israel, og høyr alltid på dei når dei ropar på deg.

⁵³For du, HERRE Gud, har skilt dei ut som din eigedom frå alle folkeslag på jorda, slik du sa gjennom Moses, tenaren din, då du førte fedrane våre ut frå Egypt.

⁵⁴Då Salomo hadde enda heile denne bøna til HERREN om nåde, reiste han seg opp framfor HERRENS altar, der han hadde lege på kne med hendene utbreidde mot himmelen.

⁵⁵Ståande velsigna han heile Israels forsamling med høg røyst og sa:

⁵⁶Velsigna er HERREN som har gjeve Israel, folket sitt, ro, så som han lova. Ikkje eitt av alle dei gode orda som han tala gjennom Moses, tenaren sin, har falle til jorda.

⁵⁷Måtte HERREN vår Gud vera med oss slik han var med fedrane våre! Måtte han ikkje forlata oss og ikkje støyta oss frå seg,

⁵⁸men bøya hjartet vårt til seg, så vi går på vegane hans og held dei boda, forskriftene og lovene som han la på fedrane våre.

⁵⁹Måtte desse orda mine som eg har bede for HERRENS andlet, vera nær HERREN vår Gud dag og natt, så han hjelper tenaren sin og Israel, folket sitt, til retten dei treng dag for dag.

⁶⁰Då skal alle folk på jorda sanna at HERREN er Gud, han og ingen annan.

⁶¹Hald dykk heilhjarta til HERREN vår Gud, så de følgjer forskriftene hans og held boda, som de gjer i dag.

⁶²Så ofra kongen og heile Israel med han slaktoffer til HERREN.

⁶³Og Salomo bar fram fredsofferet for HERREN. Det var 22 000 oksar og 120 000 sauer. Slik vigsla kongen og alle israelittane HERRENS hus.

⁶⁴Same dagen helga kongen den midtre delen av føregarden framfor HERRENS hus. Der bar han fram brennofferet, grødeofferet og feittstykka frå fredsofferet. For bronsealtaret som stod for HERRENS andlet, var for lite til å rømma både brennofferet, grødeofferet og feittstykka frå fredsofferet.

⁶⁵[26] På same tid heldt Salomo festen, og heile Israel med han. Det var ei stor forsamling som var komen saman heilt frå Lebo-Hamat til Egyptarbekken. I sju dagar og sju dagar til, i alt fjorten dagar, heldt dei høgtid for HERREN vår Guds andlet.

⁶⁶Den åttande dagen lét han folket fara. Dei bad farvel med kongen og drog heim, kvar til sitt, lukkelege og glade for alt det gode HERREN hadde gjort mot David, tenaren sin, og Israel, folket sitt.