Read nynorsk 2011 2. Kongebok 11 Bible Online

2. Kongebok 11 - nynorsk 2011 bible

2. Kongebok 11

¹Då Atalja, mor til Ahasja, fekk vita at son hennar var død, byrja ho med ein gong å rydda ut heile kongsætta.

²[32] Men Josjeba, dotter til kong Joram og syster til Ahasja, tok i løynd Joasj, son til Ahasja, bort frå dei kongssønene som skulle drepast. Ho førte han og fostermor hans inn på ein sovesal. Der gøymde dei han for Atalja, så han ikkje vart drepen.

³I seks år heldt han seg løynd hos henne i HERRENS hus medan Atalja styrte i landet.

⁴Men i det sjuande året sende presten Jojada bod etter hundremannsførarane for livvakta og for vaktmennene og lét dei koma til seg i HERRENS hus. Han gjorde ei pakt med dei og tok dei i eid i HERRENS hus. Så viste han dei kongssonen

⁵og gav dei ordre om kva dei skulle gjera: «Den tredjeparten av dykk som gjer teneste ved kongeborga på sabbatsdagen,

⁶den tredjedelen som er ved Sur-porten, og den tredjedelen som er ved porten bak vaktmennene, de skal skiftevis halda vakt ved Herrens hus.

⁷Og dei to avdelingane av alle dykk som skulle ha avløysing på sabbaten, skal halda vakt over kongen i HERRENS hus.

⁸De skal stilla dykk i ein ring rundt kongen, kvar mann med våpen i hand. Om nokon trengjer seg inn i rekkjene, skal han døy. De må følgja kongen kvar han går og står.»

⁹Hundremannsførarane gjorde i eitt og alt som presten Jojada gav ordre om. Kvar tok sine menn; dei tok både dei som gjekk på vakt på sabbaten, og dei som skulle ha avløysing, og kom til presten Jojada.

¹⁰Presten gav hundremannsførarane dei spyda og skjolda som hadde høyrt kong David til, og som var i HERRENS hus.

¹¹Og vaktmennene stilte seg opp, kvar mann med våpen i hand, frå sørsida til nordsida av tempelet, nær ved altaret og huset, i ein ring rundt kongen.

¹²Så førte Jojada kongssonen ut, sette krona på han og gav han kongesymbola. Dei ropa han ut til konge og salva han, klappa i hendene og ropa: «Leve kongen!»

¹³Då Atalja høyrde ropa frå vaktmennene og folkemengda, gjekk ho opp til folket i HERRENS hus.

¹⁴[33] Der fekk ho sjå kongen stå ved søyla, som skikken var, og stormennene og hornblåsarane attmed han, medan heile folket jubla og bles i trompetar. Då reiv Atalja sund kleda sine og ropa: «Svik, svik!»

¹⁵Men presten Jojada gav hundremannsførarane, dei som stod i spissen for hæren, denne ordren: «Før henne ut mellom rekkjene! Følgjer nokon etter henne, så drep han med sverd.» For presten hadde sagt: «Ho må ikkje drepast i HERRENS hus!»

¹⁶Så greip dei Atalja. Og då ho var komen gjennom Hesteporten og inn i kongeborga, vart ho drepen der.

¹⁷Sidan gjorde Jojada ei pakt mellom HERREN og kongen og folket: Dei skulle vera HERRENS folk. Mellom kongen og folket gjorde han òg ei pakt.

¹⁸Så gjekk heile folkemengda til Baal-tempelet og reiv det ned. Altara og gudebileta knuste dei, og Baal-presten Mattan drap dei framfor altaret. Presten Jojada sette ut vaktpostar ved HERRENS hus.

¹⁹Så tok han med seg hundremannsførarane, livvakta, vaktmennene og heile folkemengda. Dei førte kongen ned frå HERRENS hus og følgde han inn i kongeborga gjennom Vaktporten. Der sette han seg på trona.

²⁰Heile folket jubla, og det var ro i byen. Men Atalja hadde dei drepe med sverd i kongeborga.

²¹Joasj var sju år gammal då han vart konge.