Read nynorsk 2011 2. Kongebok 12 Bible Online

2. Kongebok 12 - nynorsk 2011 bible

2. Kongebok 12

¹Det var i det sjuande styringsåret til Jehu at Joasj vart konge, og han styrte i Jerusalem i førti år. Mor hans heitte Sibja og var frå Beer-Sjeba.

²Så lenge han levde, gjorde Joasj det som rett var i HERRENS auge, slik presten Jojada hadde lært han.

³Men offerhaugane vart ikkje nedlagde. Folket heldt fram å ofra og tenna offereld på haugane.

⁴Joasj sa til prestane: «Alle dei heilage gåvene som kjem inn til HERRENS hus i form av gangbar mynt — det som kvar einskild skal betala i skatt eller vil gje etter eige ønske — alt skal førast til HERRENS hus,

⁵og prestane skal ta imot, kvar frå sine underordna. Så skal dei setja tempelet i stand, alle stader der det er skadd.»

⁶Men i det tjuetredje året Joasj var konge, hadde prestane enno ikkje sett tempelet i stand der det var skadd.

⁷Då kalla kong Joasj presten Jojada og dei andre prestane til seg og sa: «Kvifor bøter de ikkje brestene i Herrens hus? No skal de ikkje lenger ta imot pengar frå dykkar underordna, men gje dei frå dykk så tempelet kan setjast i stand.»

⁸Prestane gjekk med på at dei ikkje skulle ta imot pengar av folket. Men så skulle dei heller ikkje setja i stand tempelet.

⁹Presten Jojada tok ei kiste, bora hòl i loket og sette henne på høgre sida av altaret. Når folk kom til tempelet, la prestane som heldt vakt ved inngangen, alle pengane som kom inn til HERRENS hus, i kista.

¹⁰Når dei såg at det var mange pengar i kista, kom skrivaren til kongen og overpresten. Dei samla og talde opp pengane som fanst i HERRENS hus.

¹¹Så vog dei opp pengane og gav dei til arbeidsleiarane som hadde tilsyn med HERRENS hus. Og dei gav dei til tømmermennene og bygningsmennene som arbeidde på tempelet,

¹²til murarane og steinhoggarane. Dei brukte dei òg til å kjøpa tre og hoggen stein så dei kunne setja HERRENS hus i stand att. Slik dekte dei alle utgiftene med å halda tempelet i stand.

¹³Men dei pengane som kom inn til tempelet, vart ikkje brukte til å laga sølvbollar, lysesakser, offerskåler eller trompetar eller noko anna utstyr av gull eller sølv.

¹⁴Pengane vart gjevne til arbeidsleiarane, som sytte for å setja HERRENS hus i stand.

¹⁵Ingen heldt rekneskap med dei som tok imot pengane og gav dei til handverkarane, for dei fór ærleg fram.

¹⁶Pengar frå skuldofferet og frå syndofferet gjekk ikkje til HERRENS hus. Dei fekk prestane.

¹⁷På den tid gjekk aramearkongen Hasael til åtak på Gat og tok byen. Så sette han seg føre å fara opp mot Jerusalem.

¹⁸Då tok Joasj, Juda-kongen, alle dei heilage tinga som forfedrane hans, Juda-kongane Josjafat, Joram og Ahasja, hadde helga til tempelet, og det han sjølv hadde helga. Saman med alt gullet som fanst i skattkammera, både i HERRENS hus og i kongeborga, sende han det til Hasael, aramearkongen. Han drog då bort frå Jerusalem.

¹⁹Det som elles er å seia om Joasj og alt det han gjorde, står skrive i krønikeboka til Juda-kongane.

²⁰[34] Mennene hans reiste seg mot kongen og fekk til ei samansverjing. Dei drap Joasj i Millo-huset då han var på veg ned mot Silla.

²¹Dei kongsmennene som slo han i hel, var Josakar, son til Sjimat, og Josabad, son til Sjomer. Dei gravla han hos fedrane hans i Davidsbyen, og Amasja, son hans, vart konge etter han.